«Վորլդ Վիժն Հայաստան»-ը սկսում է նոր բարեգործական արշավ

Մեկնարկում է «Վորլդ Վիժն Հայաստան»-ի «Երազանքի ճամբար» բարեգործական նախաձեռնությունը, որի նպատակն է առավել խոցելի և անապահով ընտանիքների երեխաներին հնարավորություն տալ մասնակցելու ամառային մեկշաբաթյա ճամբարին: Ինչպես տեղեկացրեցին «Վորլդ Վիժն»-ի հաղորդակցության բաժնից, արդեն 18 տար ի է, ինչ կազմակերպությունը ամռան ամիսներին անցկացնում է ճամբարներ` խոցելի ընտանիքներում ապրող երեխաներին կտրելով առօրյա գորշ գույներից և նվիրելով անմոռանալի ամառային հանգիստ:

18 տարիների ընթացքում ավելի քան 40.000 երեխա այցելել է «Վորլդ Վիժն»-ի ճամբար, որը կազմակերպվել է ինչպես կազմակերպության միջոցներով, այնպես էլ հայաստանյան ընկերությունների բարեգործական նվիրատվությունների շնորհիվ:

Այս տարի ևս «Վորլդ Վիժն»-ը նախատեսում է երեխաների համար կազմակերպել երեք թեմատիկ ճամբար՝ աղետների ժամանակ ռիսկերի նվազեցման, մարդու իրավունքների և տեղեկատվական տեխնոլոգիաների ուղղվածությամբ:

Երեխաների երազանքն իրականացնելու համար «Վորլդ Վիժն Հայաստան»-ը նախաձեռնում է համապետական բարեգործական արշավ, որի նպատակն է միջոցներ հայթայթել` 150 անապահով երեխայի մեկ շաբաթով ամառային ճամբար ուղարկելու համար:

Ակցիան անցկացվելու է Սուրբ Զատկի տոնին ընդառաջ՝ ապրիլի 3-16-ը, Երևան, Գյումրի, Վանաձոր և Կապան քաղաքներում: Ակցիայի շրջանակներում Երևանի Հյուսիսային պողոտայում և Դալմա Գարդեն Մոլում կտեղադրվեն Զատկի ծառեր, որոնց վրա յուրաքանչյուր  անցորդ քաղաքացի հնարավորություն կունենա կախել յուրօրինակ, երեխաների ձեռքով պատրաստված հավկիթ՝ կատարելով նվիրատվություն 1500-6000 դրամի չափով: Նշենք, որ յուրաքանչյուր երեխայի մեկշաբաթյա հանգստի ուղեգիրն արժե 42.000 ՀՀ դրամ։ 

Բացի այդ` նախատեսվում է ակցիայի շրջանակներում ներգրավել այլ կազմակերպությունների, որոնց լոգոտիպներով մեծ չափսի հավկիթներ կտեղադրվեն ծառի շուրջ: Նվիրատվություն հնարավոր կլինի նաև կատարել առցանց` donate.am կայքի միջոցով: