Նախագահի երիտասարդական արվեստի մրցանակին ներկայացված են 13 հավակնորդ

Մեկնարկեց ՀՀ նախագահի 2016 թվականի երիտասարդական արվեստի մրցանակի հավակնորդների աշխատանքների եզրափակիչ փուլը: Ցուցահանդեսին ներկայացված են 13 հավակնորդի աշխատանքներ՝ գեղանկարներ, լուսանկարներ, գրաֆիկական գործեր, քանդակներ: Մրցույթի կազմակերպիչն է «Հայաստան»  համահայկական հիմնադրամը: «Արմենպ րես»-ի հաղորդմամբ՝ ապրիլի 4-ին ցուցահանդեսին  բացման խոսքով հանդես եկավ հիմնադրամի ներկայացուցիչ, մրցույթների կազմակերպիչ Աիդա Խաչիկյանը:

«Նախագահի մրցանակները շնորհվում են յուրաքանչյուր տարի 12 տարբեր բնագավառներում՝ ցեղասպանության, գիտության, գրականության, արվեստի տարբեր ճյուղերի մրցանակներ: Այս տարի «Արվեստ» բնագավառում ստացել ենք 16 դիմում-հայտ: Ժյուրին երեք փուլով ընտրել է լավագույն 13-ին: Մրցույթն իրականացվում է 2000 թվականից: Այս տարիների ընթացքում արվեստի  բնագավառում ստեղծագործող 38 երիտասարդ ստացել է մրցանակ»,- ասաց Աիդա Խաչիկյանն ու մրցանակի հավակնորդներին ցանկացավ նորանոր ստեղծագործական հաջողություններ: 

Միքայել Հարությունյանը, ով  Երևանի գեղարվեստի պետական ակադեմիայի ուսանող է, ցուցահանդեսին ներկայացնում է Կոմիտաս վարդապետին նվիրված կտավ՝ «Կաքավիկը»: Նկարում պատկերված է Կոմիտաս վարդապետը՝ ձեռքին կաքավիկ: «Փորձել եմ Կոմիտասին ավելի լուսավոր նկարել՝ զերծ իր կյանքի ցեղասպանության հետ կապված դրվագից: Նկարել եմ 2016 թվականին՝ ոչ հատուկ ցուցահանդեսի համար: Նախագահական մրցանակի մասին վաղուց գիտեի, բայց, կարծում եմ, մասնակցության պահն այս տարի հասունացավ: Հիմնադրամին հայտ ներկայացրեցի, մասնակից աշխատանքի հետ միասին ուղարկեցի մի քանի նկարներ ևս, անցա երկու փուլերն ու հասա եզրափակիչ փուլ»,- ասաց նկարի հեղինակը:  

Ռիմա Նանյանը ցուցահանդեսին ներկայանում է «Անորոշ մարմնավորումներ» գրաֆիկական շարքով: Ռիման մասնակցել է նաև անցյալ տարի, անցել է մինչ վերջին փուլը: Այս տարի ևս որոշել է փորձել ուժերը:

 «Շատ ոգևորիչ է այս մրցանակաբաշխությունը: Բոլոր տասներեք թեկնածուներին կարելի է արդեն շնորհավորել: Երրորդ՝ վերջին փուլն ամենադժվարն է, քանի որ հավաքված են շատ հետաքրքիր աշխատանքներ: Ինձ հարցնում են, թե ինչու են այս տարի աշխատանքները քիչ, սակայն քանակի մեջ չէ էությունը: Գուցե քիչ են, բայց շատ ավելի լավն են: Մեզ դժվար կլինի ընտրել լավագույնին»,- ասաց Նկարիչների միության նախագահ Կարեն Աղամյանն ու իր շնորհակալությունը հայտնեց մասնակիցներին և «Հայաստան» համայկական հիմնադրամին: 

Մրցույթն ավարտվելուց հետո հիմնադրամը կամփոփի արդյունքները, կներկայացնի նախագահի ստորագրմանը, որից հետո կհրապարակվեն արդյունքները: Մրցանակները հատուկ արարողությամբ կշնորհվեն մայիսի 26-ին նախագահի նստավայրում:

[gallery id= 58723]