Պետերբուրգյան ահաբեկչություն. 14 զոհ և 62 տուժած

Երեկ ժամը 15:35-ի սահմաններում Ռուսաստանի Դաշնության Սանկտ Պետերբուրգ քաղաքում՝ պետերբուրգյան մետրոպոլիտենի «Տեխնոլոգիական ինստիտուտ» և «Սենայի հրապարակ» կայարանների մոտ պայթյուն էր տեղի էր ունեցել: Հայտարարվել է եռօրյա սուգ:

Ըստ Արտակարգ իրավիճակների նախարարության պաշտոնական կայքի՝ առավոտյան ժամը 8:10-ի դրությամբ պայթյունի հետևանքով զոհվել է 14 և տուժել՝ 62 մարդ:

Ինչպես հաղորդում է ռուսական РБК կայքը՝ Սանկտ Պետերբուրգի հիվանդանոցներում և դաշնային բժշկա-կենսաբանական գործակալության և Պաշտպանության նախարարության ռազմաբժշկական ակադեմիայի Կիրովի անվան  բժշկական կենտրոններում այս պահի դրությամբ գտնվում են 49 տուժած, ևս 13 հոգի տուն են ուղարկվել:

Ռուսաստանի առողջապահության նախարար Վերոնիկա Սկվորցովան կայքին տված հարցազրույցում նշել է, որ բոլոր տուժածները գտնվում են բժիշկների խստագույն հսկողության տակ, նրանց սպասարկում են հանրապետության լավագույն մասնագետները: Վերջիններն անում են ամենը տուժածների արագ ապաքինման և վերականգնման համար: Թեև ինչպես կարդում ենք վերոնշյալ կայքում, տուժածների մեջ կան և այնպիսիք, որոնց ստացած վնասվածքները բավական բարդ են:

Արտակարգ իրավիճակների նախարարության տեղեկատվության և հասարակայնության հետ կապերի վարչությունից «Փաստին» փոխանցեցին, որ այս պահի դրությամբ իրենք չունեն որևէ տեղեկություն, որ զոհվածների մեջ ազգությամբ հայեր կարող են լինել:

«Մեր ունեցած տվյալներով՝ տուժածների մեջ հայեր չկան: Զոհերի մեջ դեռևս կան դիեր, որոնք դեռևս չեն ճանաչվել: Եթե ինչ-որ փոփոխություն լինի, ճանաչվեն այդ դիերը հարազատների կողմից, հստակեցվեն բոլոր տվյալները, ու եթե ինչ-որ փոփոխություն լինի, մենք կայքում կտեղադրենք համապատասխան տեղեկատվությունը»,- հայտնեցին մեզ:

«Ինտերֆաքսի» փոխանցմամբ՝ պայթուցիկը տեղադրված է եղել մետրոյի վագոնի նստարանի տակ:

Սանկտ-Պետերբուրգի մետրոպոլիտենում տեղի ունեցած ահաբեկչության մեջ մեղադրվում է Ղրղզտանի նախկին քաղաքացին, ով վերջերս ձեռք էր բերել ռուսական քաղաքացիություն: Այս մասին այսօր հայտարարել է Ղրղզտանի Ազգային անվտանգության պետական կոմիտեի պաշտոնական ներկայացուցիչ Ռահաթ Սուլայմանովը: Այս մասին հաղորդում է «ՏԱՍՍ»-ը:

Սանկտ Պետերբուրգի մետրոյում տեղի ունեցած պայթյունը, ըստ ռուսական լրատվամիջոցների, մահապարտ-ահաբեկիչն է կազմակերպել:

Սանկտ Պետերբուրգի մետրոպոլիտենի պաշտոնյաներից մեկը «Փաստի» հետ զրույցում նշեց, որ այս պահին թե´ մետրոպոլիտենում և թե´ առհասարակ քաղաքում ամեն ինչ նորմալ է:

«Մետրոն իր սովորական աշխատանքային ռեժիմով աշխատում է: Կարելի է ասել այն  ինչ կատարվեց երեկ, անցած էտապ է: Մետրոպոլիտենը ամբողջությամբ աշխատում է: «Տեխնոլոգիական ինստիտուտ» և «Սենայի հրապարակ» կայարանները նույնպես բաց են ուղևորների համար»,- տեղեկացրեց նա:

Սակայն, ըստ ռուսական մամուլի՝ «Վլադիմիրսկայա» և «Դոստոևսկայա» կայարանները փակվել են, դրանց մոտով անցնող գնացքերը կանգ չեն առնում:

Հավելենք, որ այսօր մետրոպոլիտենի ծառայությունից է օգտվել նաև Լենինգրադյան նահանգի ղեկավար Ալեքսանդր Դրոզդենկոն՝ ի նշան աջակցության իր այն համաքաղաքացիներին, ովքեր վախենում են օգտվել մետրոյից:

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ