ԱՄՆ-ում շարունակվող հրաձգությունները մարդկային բազմաթիվ կյանքեր են խլում

Երեք մարդ է զոհվել ԱՄՆ-ի Ֆլորիդայի նահանգի Ինգլիս քաղաքում տեղի ունեցած հրաձգության հետեւանքով, հանցագործն ինքնասպան է եղել: Այդ մասին,  հաղորդել է Fox 13 հեռուստաալիքը՝ հղում անելով ոստիկանությանը:

Ոստիկանությունը հաղորդում է ստացել քաղաքային վարչակազմի շենքից ոչ հեռու գտնվող տներից մեկում տեղի ունեցած հրաձգության վերաբերյալ: Երկու հոգի՝ տղամարդ եւ կին, զոհվել են տեղում, եւս մեկ տուժածի տեղափոխել են հիվանդանոց: Ոստիկանությունը նաեւ տանը հայտնաբերել է ենթադրյալ հանցագործի դին, որը, հետաքննության վարկածով, ինքնասպան է եղել:

Հոկտեմբերի 1-ին հրաձգության հետ կապված աղմկալի միջադեպ է եղել ԱՄՆ-ի Օրեգոնի նահանգի Ռոզբերգ քաղաքի մերձակա քոլեջում: Ըստ վերջին տվյալների՝ հրաձգության ընթացքում զոհվել է տասը մարդ, եւս յոթը վիրավորվել են: Հրաձիգն ինքը սպանվել է ոստիկանների կողմից:

Օրեգոնում հրաձգության հետեւանքով մեծաթիվ զոհերն այդօրինակ հերթական միջադեպն են դարձել ԱՄՆ-ում, որտեղ զենք կրելու իրավունքը երաշխավորված է սահմանադրությամբ, իսկ հրազենի շրջանառության նկատմամբ հսկողության վերաբերյալ օրենքներն ավելի մեղմ են, քան այլ երկրներում:

ԱՄՆ-ի նախագահ Բարաք Օբաման Օրեգոնում կատարված հանցագործության վերաբերյալ հանդես է եկել էմոցիոնալ հայտարարությամբ եւ կոչ է արել Կոնգրեսին՝ խստացնել զենքի վերահսկողության բնագավառի օրենսդրությունը: Այդ կապակցությամբ Օբամայի նախորդ օրենսդրական նախաձեռնությունները ձախողվել են Կոնգրեսում, հաղորդել է ՌԻԱ Նովոստին: