Արմեն Մարտիրոսյանը չի բացառում «Օհանյան-Րաֆֆի-Օսկանյան» դաշինքում ներգրավված ուժերի մեկ կուսակցություն դառնալու հնարավորությունը

 «Ժառանգություն» կուսակցության փոխնախագահ Արմեն Մարտիրոսյանը չի բացառում, որ «Օհանյան-Րաֆֆի-Օսկանյան» դաշինքում ներգրավված ուժերը կարող են դառնալ մեկ կուսակցություն: Ապրիլի 5-ին լրագրողների հետ հանդիպմանը Արմեն Մարտիրոսյանն ընդգծեց, որ այդ հարցը քննարկման փուլում է:

«Ես կարող եմ միայն հաստատ ասել, որ դաշինքում ներգրավված ուժերի համագործակցությունը շարունակվելու է: Իհարկե, երբ Կենտրոնական ընտրական հանձնաժողովը պաշտոնապես ներկայացնի ընտրությունների արդյունքները, այդ պահից սկսած դաշինքը իրավաբանորեն արդեն գոյություն չի ունենա, բայց մեր համագործակցությունը միանշանակ շարունակվելու է: Իսկ մեկ կուսակցություն դառնալը քննարկման հարց է, ուստի այս պահին ես ոչինչ չեմ կարող բացառել»,- «Արմենպրես»-ի հաղորդմամբ` ասաց Մարտիրոսյանը:

Հարցին, թե ի՞նչ ձևաչափով են շարունակելու իրենց գործունեությունը, Արմեն Մարտիրոսյանն ընդգծեց, որ շարունակելու են պայքարը փողոցում: «Մենք շարունակելու ենք փողոցային պայքարը, ինչը մենք անում ենք` սկսած 2002-ից»,- ասաց Մարտիրոսյանը:

Դաշինքի տեղեկատվական կենտրոնի համակարգող, «Ժառանգություն» կուսակցության անդամ Հովսեփ Խուրշուդյանն էլ ընդգծեց, որ իրենք երկրում լուծման ենթակա բազմաթիվ խնդիրներ են տեսնում ու չեն կարող ձեռքերը ծալած նստել ու սպասել միայն նրա համար, որ ընտրություններում հաջողության չեն կարողացել հասնել:

«Օհանյան-Րաֆֆի-Օսկանյան» դաշինքը ձևավորվել էր Հայաստանում ապրիլի 2-ին կայացած խորհրդարանական ընտրություններին մասնակցելու համար: Դաշինքում ներգրավված են «Ժառանգություն» և «Համախմբում» կուսակցությունները, ինչպես նաև ՀՀ պաշտպանության նախկին նախարար Սեյրան Օհանյանը: Ընտրությունների նախնական արդյունքներով «Օհանյան-Րաֆֆի-Օսկանյան» դաշինքը հավաքել է 32 հազար 504 ձայն, ինչը բավարար չի եղել անհրաժեշտ 7 տոկոսի շեմը հաղթահարելու և խորհրդարանում հայտնվելու համար: