Հարկային եկամուտների ու պետական տուրքերի 40.2 տոկոսը հունվար-փետրվարին ապահովվել է ԱԱՀ-ի հաշվին

2017 թվականի հունվար-փետրվարին ՀՀ պետական բյուջե են մուտքագրվել շուրջ 164.2 մլրդ դրամ հարկային եկամուտներ և պետական տուրքեր, որոնք կազմել են եռամսյակային ծրագրի 67.5%-ը: «Արմենպրես»-ի հաղորդմամբ` այս մասին են վկայում ՀՀ ֆինանսների նախարարության հրապարակած տվյալները: 2016 թվականի նույն ժամանակահատվածի համեմատ հարկերն ու տուրքերն աճել են 9.7%‑ով կամ 14.6 մլրդ դրամով, որոնք հիմնականում ձևավորվեÕ ¬ են ավելացված արժեքի հարկի, բնապահպանական և բնօգտագործման վճարների, ակցիզային հարկի և մաքսատուրքի գծով մուտքերի աճի ու շահութահարկի գծով մուտքերի նվազման արդյունքում:

2017 թվականի պետական բյուջեի հունվար-փետրվարին հարկային եկամուտների և պետական տուրքերի 40.2%-ն ապահովվել է ավելացված արժեքի հարկի հաշվին: Այն կազմել է 66 մլրդ դրամ և 12.2%-ով կամ 7.2 մլրդ դրամով գերազանցել նախորդ տարվա նույն ցուցանիշը: ԱԱՀ-ի մուտքերից շուրջ 23.5 մլրդ դրամը ստացվել է ՀՀ սահմանին հարկումից, 42.6 մլրդ դրամը` ապրանքների և ծառայությունների ներքին շրջանառությունից: ԱԱՀ-ի մուտքերի աճը մեծ մասամբ պայմանավորված է ներքին շրջանառությունից ստացված մուտքերի 14.7%-ով (կամ 5.5 մլրդ դրամով) աճով: Մաքսային սահմանին գանձված մուտքերը նույնպես աճել են` 8% ‑ով (կամ 1.7 մլրդ դրամով):

Հաշվետու ժամանակահատվածում պետական բյուջեի հարկային եկամուտների ու պետական տուրքերի 6.4%-ն ապահովվել է ակցիզային հարկի հաշվին` կազմելով ավելի քան 10.5 մլրդ դրամ: Մասնավորապես, հանրապետություն ներմուծվող ենթաակցիզային ապրանքների հարկումից ստացվել է 5.2 մլրդ դրամ, հանրապետությունում արտադրվող ենթաակցիզային ապրանքների հարկումից` 5.3 մլրդ դրամ: Նախորդ տարվա նույն ժամանակահատվածի համեմատ ակցիզային հարկի մուտքերն աճել են մոտ 42.5%-ով կամ 3.1 մլրդ դրամով: Աճ է արձանագրվել և´ տեղական արտադրության (67.7%-ով կամ շուրջ 2.2 մլրդ դրամով), և´ ներմուծվոÕ ² ենթաակցիզային ապրանքների գծով մուտքերում (23.5%-ով կամ 992.7 մլն դրամով): Այն հիմնականում ապահովվել է ծխախոտի արտադրանքից ստացված մուտքերի հաշվին:

Հաշվետու ժամանակահատվածում պետական բյուջեի հարկային եկամուտների և պետական տուրքերի 7.3%‑ը ձևավորվել է շահութահարկի հաշվին` կազմելով ավելի քան 11.9 մլրդ դրամ: Նախորդ տարվա հունվար-փետրվար ամիսների համեմատ շահութահարկի մուտքերը նվազել են 8.8%-ով կամ 1.1 մլրդ դրամով:

2017 թվականի հունվար-փետրվարի ընթացքում պետական բյուջեի հարկային եկամուտների և պետական տուրքերի 4.8%-ն ապահովվել է մաքսատուրքի մուտքերի հաշվին` կազմելով շուրջ 7.9 մլրդ դրամ: 2016 թվականի նույն ժամանակահատվածի համեմատ մաքսատուրքի մուտքերն աճել են 16.3%‑ով կամ 1.1 մլրդ դրամով:

2017 թվականի հունվար-փետրվարի ընթացքում պետական բյուջե են մուտքագրվել 3.5 մլրդ դրամ պետական տուրքեր` կազմելով առաջին եռամսյակի ծրագրի 53.5%-ը: Նախորդ տարվա նույն ժամանակահատվածի համեմատ նշված մուտքերը նվազել են 5.3%‑ով կամ 196.1 մլն դրամով, ինչը հիմնականում պայմանավորված է ֆիզիկական անձանց տրվող իրավաբանական նշանակություն ունեցող փաստաթղթերի, որոշակի ծառայությունների կամ գործողությունների և լիցենզավորման ենթակա գործունեություն իրականացնելու նպատակով լիցենզիաներ տալու համար գանձվող տուրքերի նվազմամբ:

Հաշվետու ժամանակահատվածում գործունեության առանձին տեսակներից գանձվել են 602.9 մլն դրամ հաստատագրված վճարներ` ապահովելով պետական բյուջեի հարկային եկամուտների և պետական տուրքերի 0.4%-ը: Նշված ցուցանիշը նախորդ տարվա հունվար-փետրվար ամիսների համեմատ աճել է 19.2%‑ով կամ 97.1 մլն դրամով:

2017 թվականի հունվար-փետրվարին ՀՀ պետական բյուջե են մուտքագրվել 5.3 մլրդ դրամ բնապահպանական և բնօգտագործման վճարներ` կազմելով պետական բյուջեի հարկային եկամուտների և պետական տուրքերի 3.3%-ը: Նախորդ տարվա նույն ժամանակահատվածի համեմատ նշված եկամուտներն աճել են 2.7 անգամ կամ շուրջ 3.4 մլրդ դրամով, ինչը հիմնականում պայմանավորված է արդյունահանված մետաղական օգտակար հանածոների և դրանց վերամշակման արդյունքում ստացված արտադրանքի իրացման համար վճարվող ռոյալթիի գծով մուտքերի աճով, որը կազմել է 3.7 մլրդ դրամ և 5.8 անգամ կամ 3.1 մլրդ դրամով գերազանցել նա խորդ տարվա նույն ժամանակահատվածի ցուցանիշը:

Հաշվետու ժամանակահատվածում 49.7 մլրդ դրամ են կազմել եկամտային հարկից ստացված մուտքերը՝ ապահովելով պետական բյուջեի հարկային եկամուտների և պետական տուրքերի 30.3%‑ը և 0.8%‑ով կամ 397.1 մլն դրամով գերազանցելով նախորդ տարվա նույն ժամանակահատվածի ցուցանիշը:

2017 թվականի հունվար-փետրվարի ընթացքում ՀՀ պետական բյուջե է մուտքագրվել 3 մլրդ դրամ շրջանառության հարկ, որը կազմել է պետական բյուջեի հարկային եկամուտների և պետական տուրքերի 1.8%-ը և 18.9%-ով կամ 481.5 մլն դրամով գերազանցել նախորդ տարվա համապատասխան ցուցանիշը:

Հաշվետու ժամանակահատվածում շուրջ 2.1 մլրդ դրամ են կազմել նպատակային սոցիալական վճարները՝ ապահովելով պետական բյուջեի հարկային եկամուտների և պետական տուրքերի 1.3%‑ը և 18.2%‑ով կամ 316.4 մլն դրամով գերազանցելով նախորդ տարվա նույն ժամանակահատվածի ցուցանիշը: