«Թող կանայք երբեք չլինեն գերագնահատված կամ թերագնահատված». Գարիկ Պապոյան, Սոնա Ռուբենյան

Aravot.am-ը գրում է.

«Մենք մտածում էինք, որ եղանակի պատճառով հեսա գալու ենք մենք մերոնցով նվագենք, երգենք, գնանք, հա, մենք մերոնցով ենք էսօր ժողովուրդ»,- ահա այսպես իր խոսքը սկսեց Գարիկ Պապոյանը, ով զարմացած էր ու շնորհակալ, որ հանդիսատեսը անտեսել էր անձրևը ու հավաքվել Շառլ Ազնավուրի հրապարակում` վայելելու Սոնա Ռուբենյանի և Գարիկ Պապոյանի համերգը` նվիրված մայրության և գեղեցկության օրվան:

Համերգի ընթացքում հնչեցին արդեն իսկ հայտնի ու սիրված երգերի վերամշակված տարբերակները, որոնց անդադար ձայնակցում էր նաև հանդիսատեսը. « Ես անգիր գիտեմ բոլոր երգերը և անհնար էր այսօր ներկա չգտնվեի այստեղ. նրանք էներգիայի մեծ աղբյուր են»,- ասաց երկրպագուներից մեկը:

Գարիկն ու Սոնան Aravot.am-ի հետ զրույցում շնորհավորեցին կանանց ու աղջիկներին.« Թող բոլոր կանայք, ամենակարևորը,լինեն գնահատված: Երբեք չլինեն գերագնահատված կամ թերագնահատված, որովհետև երկու պարագայում էլ իրենք իրենց սխալ են գնահատում: Թող իրենց կողքին լինեն մարդիկ, ովքեր գոնե ապրիլի 7-ին կհիշեցնեն, որ իրենք ամենագեղեցիկն ու ամենալավն են այս աշխարհում»: Լիլիանա ՕՍԻՊՅԱՆ