Վահրամ Բաղդասարյանը խոսել է Արտակ Սարգսյանի օգտին ձայներ հավաքելու ձայնագրության մասին

Ազգային ժողովի ՀՀԿ խմբակցության ղեկավար Վահրամ Բաղդասարյանն անդրադարձել է համացանցում տարածված ձայնագրությանը, որում «ՍԱՍ Գրուպ» ընկերության ներկայացուցիչը ընկերության աշխատակիցներին ստիպում է ձայներ հավաքել ՀՀԿ տարածքային ցուցակով պատգամավորության թեկնածու առաջադրված Արտակ Սարգսյանի համար: Ապրիլի 14-ին խորհրդարանական ճեպազրույցների շրջանակներում լրագրողների հետ հանդիպմանը Վահրամ Բաղդասարյանն ընդգծ եց, որ ձայնագրությանը չի հասցրել ծանոթանալ, քանի որ այն բավականին երկար է:

«Ես չէի ցանկանա հիմա մեկնաբանել լրատվության նյութերը, ինձ պարզապես տեղեկացրել են այդ մասին, բայց ես չեմ հասցրել ուսումնասիրել: Սակայն ես կարծում եմ, որ կուսումնասիրվի արդյոք պատգամավորության թեկնածուն տեղյա՞կ է եղել այդ ամենից: Ես կուսումնասիրեմ և ապագայում կխոսեմ այդ մասին»,- «Արմենպրես»-ի հաղորդմամբ՝ ասաց Բաղդասարյանը:

Հարցին՝ կարո՞ղ է այդ ձայնագրությունը հիմք հանդիսանալ, որ Արտակ Սարգսյանը վայր դնի մանդատը, Վահրամ Բաղդասարյանը կրկին պատասխանեց, որ այդ մասին կխոսի, երբ մանրամասն կուսումնասիրի նյութերը: «Ես չեմ ցանկանում առանց ուսումնասիրելու մեկնաբանություններ անել»,- նշեց նա:

Հարցին՝ ՀՀԿ-ում չե՞ն քննարկել այդ ձայնագրությունը, ԱԺ ՀՀԿ խմբակցության ղեկավարն ընդգծեց, որ առաջիկայում կուսակցությունը գործադիր մարմնի նիստ կունենա, որի ժամանակ, եթե լինի անհրաժեշտություն, այդ հարցը կքննարկի:

Վահրամ Բաղդասարյանի խոսքով՝ եթե նման դեպքերը լայնածավալ բնույթ են կրել, ապա դրանց հարկավոր է անդրադառնալ:

Ապրիլի 13-ին համացանցում տարածվել է 40 րոպե տևողությամբ ձայնագրություն, որում «ՍԱՍ Գրուպ» ընկերության ներկայացուցիչը աշխատակիցներին ստիպում է ձայներ հավաքել ՀՀԿ ռեյտինգային ցուցակով պատգամավորության թեկնածու առաջադրված Արտակ Սարգսյանի համար՝ սպառնալով աշխատանքից ազատել նրանց, ովքեր չեն զբաղվի Արտակ Սարգսյանի համար ձայներ հավաքելու գործով: