«Ապագաս դեռ չեմ տեսնում». Լիա Զախարյան

Past.am-ի զրուցակիցը երիտասարդ, բայց արդեն սիրված դերասանուհի Լիա Զախարյանն է:

- Ինչպես գիտենք, այժմ նկարահանվում եք «Շանթ Պրեմիում»-ով հեռարձակվող «Outdance» սիթքոմում: Ինչպե՞ս ստացաք առաջարկը:

- Առաջարկն ստացել եմ սիթքոմի տնօրեն Նարեկ Բիլբուլյանից՝ դեռ նախորդ ամռանը: Գրեթե մեկ տարի մենք նախապատրաստական աշխատանքներ ենք տարել, փորձել, պարեր ենք բեմադրել, որից հետո, երբ արդեն կազմը պատրաստ էր, սկսեցինք նկարահանումները: Միաժամանակ ես էլ ավարտեցի կերպարս «Փոխնակ մայր»-ում և տեղափոխվեցի սիթքոմ:

- Նկարահանումներն ինչպե՞ս են ընթանում: Դերասանական կազմը հավանու՞մ եք:

- Նկարահանումները շատ սիթքոմային են: Ե՛վ սիթքոմի ներսում, և՛ սիթքոմից դուրս մեզ մոտ հումորն է իշխում, մթնոլորտը՝ ջերմ, ընկերական: Դերասանական կազմում, ինչպես նաև՝ նկարահանող անձնակազմում, բոլորս երիտասարդներ ենք, արվեստի տարբեր ճյուղերի ներկայացուցիչներ, ու շատ հետաքրքիր է. մեկը երգում է, մյուսը՝ լավ պարում:

- Ձեր ուսումը չի՞ տուժում աշխատանքի արդյունքում:

- Միշտ ասում են, որ մի լավ բան անելու համար մեկ ուրիշը պետք է զոհաբերել, բայց ես համամիտ չեմ: Չգիտեմ՝ ինչպես է ստացվում, բայց ես ամեն ինչ հասցնում եմ. և՛ քննություններս եմ բարեհաջող հանձնում, և՛ բացակայություններս այնքան շատ չեն, և՛ նկարահանումներին եմ պարտաճանաչ ներկայանում: Կարծում եմ՝ կարևորը ցանկությունն է: Եթե մի բան ուզում ես անել, հասցնելը քեզնից է կախված:

- Դուք մասնագիտությամբ նաև դիվանագետ եք ու լեզվաբան: Ինչպե՞ս եք կարողանում համատեղել 3 մասնագիտությունները:

- Մասնագիտությունները ես հերթականությամբ եմ սովորել, իրար հետ չեմ խառնել, մեկն ավարտել եմ, անցել մյուսին: Կարծում եմ՝ իմ երեք մասնագիտությունները փոխկապակցված են իրար: Յուրաքանչյուր բնագավառում պետք է օտար լեզու: Ես դերասանուհի եմ. գուցե գնում եմ արտասահմանյան շուկա, ինձ արդեն օտար լեզուն պետք է՝ մեկ ուրիշ երկրի կինոյում նկարահանվելու համար: Դիվանագիտության մեջ էլ, կարծում եմ, պետք է լինել լավ դերասան, որպեսզի կարողանաս քաղաքական բոլոր պայմանագրերը հօգուտ քո երկրի կնքել, իսկ դրա համար դերասանի ճարտար լեզու ու ճիշտ ներկայանալու հմտություն է պետք: Միևնույն ժամանակ, դերասանն էլ պետք է դիվանագետ լինի, որպեսզի կարողանա դիվանագիտորեն առաջ տանել իր դերասանական կարիերան:

- Ապագայում Ձեզ ավելի շատ որպես դիվանագե՞տ եք տեսնում, լեզվաբա՞ն, թե՞ դերասանուհի:

- Ապագաս դեռ չեմ տեսնում, դեռ գնում եմ դեպի ապագա: Ներկա պահին, աշխատում եմ որպես դերասանուհի, բայց շարունակում եմ ուսումնասիրել, խորանալ մյուս երկու մասնագիտություններիս մեջ՝ նախ, որովհետև չեմ ուզում մոռանալ այն, ինչի վրա այդքան ժամանակ եմ ծախսել, երկրորդ՝ դրանք ինձ իրոք պետք են իմ կյանքի այս փուլում և երրորդ՝ ես չգիտեմ՝ վաղն ինչ կլինի, վաղը որտեղ կհայտնվեմ և որ մասնագիտությամբ կկարողանամ փրկել իմ ներկան կամ ապագան:

- Մինչ այժմ խաղացած դերերից ո՞րն է Ձեզ համար ամենասիրելին:

- Բոլոր դերերս սիրել եմ, բոլորը հատ - հատ հիշում եմ, նույնիսկ՝ ինչպես եմ տեքստերը սովորել: Բայց, ինչպես ասում են, առաջինը երբեք ոչնչի հետ չես համեմատի, այն միշտ ավելի քաղցր է լինում ու հիշվող: Իմ դեպքում դա «Եռաչափ սեր»- Լիլիթի կերպարն էր: Հումորային, ակտիվ կերպար էր, որը, կարծում եմ, սիրվեց հեռուստադիտողի կողմից ու հիշվեց: Վերջերս էլ նկատեցի, որ հեռուստատեսությամբ կրկնում են առավոտյան ժամերին: Ցավոք, չեմ հասցնում հետևել, բայց ուրախ եմ, որ դեռ ցույց են տալիս: Նշանակում է՝ այն ունի պահանջարկ ու դիտվում է:

- Պատահե՞լ է, որ վերջին շրջանում ինչ-որ ֆիլմ դիտելիս մտածեք, որ կուզենայիք խաղալ դրա կերպարներից մեկի դերում:

- Որևէ դեր չեմ ֆիքսել, բայց կան ֆիլմեր և դերասաններ, ում հետ կցանկանայի խաղալ: Վերջին ֆիլմը, որը դիտել եմ, «Вне себя»-ն էր, և շատ կցանկանայի դրա գլխավոր հերոսի՝ Ռայան Ռեյնոլդսի հետ խաղալ: Նրա յուրաքանչյուր հայացքից, տված էմոցիաներից ես ազդվում էի: Հաճույքով կցանկանայի նաև իմ ամենասիրելի դերասանի, իմ իդեալի՝ անգլիացի դերասան, ռեժիսոր և պրոդյուսեր Բենեդիկտ Քեմբերբեչի հետ խաղալ՝ ցանկացած ժանրի ֆիլում, մանավանդ, դետեկտիվում:

- Առաջարկներ շա՞տ եք ունենում, հաջորդ կերպարն արդեն հայտնի՞ է:

- Առաջարկներ միշտ եմ ունենում, բայց հաջորդ կերպարս դեռ հայտնի չէ, քանի որ ես հիմա ամբողջովին մտել եմ սիթքոմի մեջ և հույս ունեմ, որ այն երկար կյանք կունենա, ես էլ դեռ կշարունակեմ դրանում հանդես գալ: Դերս ինձ դուր է գալիս, ինչքան այն կապրի, կապրեմ հետը, այնուհետև կմտածեմ եկող առաջարկների մասին:

 

Մարիամ Նալբանդյան