Թեքեյան կենտրոնում անցկացրեց 7-րդ Թեքեյանական օլիմպիադան

 Թեքեյան կենտրոնում ապրիլի 12-ին անցկացրեց 7-րդ Թեքեյանական օլիմպիադան՝ հայոց լեզու և գրականություն, մաթեմատիկա, անգլերեն առարկաներից:  Յուրաքանչյուր դպրոց ներկայացրել էր 12 աշակերտ՝ 8-րդ դասարանից: Կենտրոնի աշխատակից Սեդա Խաչատրյանը մասնակից աշակերտներին ներկայացրեց օլիմպիադայի կանոնակարգը, հանձնախմբին և մասնակիցներին մաղթեց հաջողություն:

Հանձնախմբի անդամները բացատրեցին՝ ինչպես պետք է աշխատել և բաժանեցին հարցաթերթիկները: Յուրաքանչյուր առարկայից  մասնակցում էր 21 աշակերտ: Բացի թեքեյանականներից, օլիմպիադային մասնակցում էին 3 սիրիահայ աշակերտներ, ովքեր արդեն սովորում են երևանյան դպրոցներում: Մեկ ու կես ժամ անց աշակերտներն ավարտեցին աշխատանքները: Բոլորին հատկացվեցին մասնագիտական գրքեր՝ «Զանգակ» հրատարակչության նվիրատվությունը: Հիմնադրամը հոգացել էր նաև երեխաների սննդի, տեղափոխման, թատրոն այցելելու ծախսերը:

Երեխաներն այցելեցին Պատանի հանդիսատեսի թատրոն դիտեցին «Քաջ Նազար» կատակերգությունը: Երեկոյան «Թեքեյան կենտրոն»-ում հայտարարվեց մրցույթի արդյունքները: Մինչ այդ՝ ներկաներին ելույթով ողջունեցին Կարբիի դպրոցի  սաները: Հանդեսը նվիրվեց Հայոց բանակի 25-ամյա տարեդարձին: Ելույթից հետո կենտրոնի տնօրեն Արմեն Ծուլիկյանը շնորհավորեց օլիմպիադայի մասնակիցներին, շնորհակալություն հայտնեց Կարբիի դպրոցի աշակերտներին տպավորիչ ելույթի համար՝  հույս հայտնելով, որ ելույթ ունեցողները, հատկապես տղաները, տարիներ անց կհամալրեն Հայոց բա նակի սպայական կազմը: Բոլոր մասնակիցներին հանձնեց շնորհակալագրեր և հուշանվերներ: Արմեն Ծուլիկյանն օլիմպիադայի կայացման գործում կարևոր համարեց մասնագիտական հանձնաժողովների դերը և շնորհակալություն հայտնեց հայոց լեզվի և գրականության հանձնաժողովի նախագահ, Երևանի «Ուսմունք» վարժարանի փոխտնօրեն Անահիտ Ավետիսյանին, Մ. Գալշոյանի անվ. թիվ 148 դպրոցի փոխտնօրեն, մաթեմատիկայի հանձնաժողովի նախագահ Անահիտ  Գևորգյանին և ԵՊՀ դասախոս, անգլերենի հանձնաժողովի նախագահ Արուս Մարգարյանին՝ բոլորին հանձնելով շնորհակալագիր և ծաղկեփունջ: Մրցույ թի արդյունքները հայտարարեցին հանձնաժողովների նախագահները և հաղթողներին հանձնեցին պատվոգրեր, գովասանագրեր ու հուշանվերներ: Բերձորի դպրոցից  2 աշակերտ՝ Նարե Հովսեփյանը և Գայանե Ըռքոյանը, արժանացան գովասանագրի դրսևորած առաջադիմության համար, իսկ Ռուզաննա Հովակիմյանը՝ առաջին մրցանակի: Մաթեմատիկայից առաջին մրցանակի արժանացավ Կարբիի դպրոցի աշակերտ Պարիս Բաղդասարյանը, իսկ անգլերենից՝  Գևորգ Թումաղյանը՝ Երևանից: Առաջին տեղի մրցանակները հանձնեց Ա. Ծուլիկյանը, ով նաև կարևորեց Թեքեյանի անվ. դպրոցների կապը կենտրոնի հետ՝ առանձնակի գոհունակություն հայտնելով Բերձորի թիվ 1 միջնակարգի անձնակազմից, տնօրենությունից, որ ձեռնարկում են հայրենանվեր գործունեություն և մշտապես համագործակցում են Կենտրոնի հետ: Կարևորեց նաև այն, որ կրթամշակութային միջոցառումների կայացմանը մեծ աջակցություն է ցուցաբերում ՀՀ կրթության և գիտության նախարարությունը:

Ներկաներին ողջունեց, «Թեքեյան կենտրոն»-ից գոհունակություն հայտնեց ՀՀ ԿԳՆ Սփյուռքի հետ կապերի վարչության պետ Կարեն Մնացականյանը: Ողջույնի խոսքով հանդես եկան նաև Կարբիի ու Բերձորի դպրոցների տնօրենները: Կարբիի դպրոցի նորանշանակ տնօրեն Սաթենիկ Հակոբյանը գոհունակություն հայտնեց թեքեյանականներին հայրենանվեր գործունեության, կրթական գործին օժանդակելու համար:  Բերձորի Վ. Թեքեյանի անվ. միջնակարգի տնօրեն Անահիտ Քոսակյանը բարձր գնահատեց կենտրոնի դերը կրթադաստիարակչական գործում, տեղեկացրեց, որ իր ղեկավարած կրթօջախը մշտապես է համա գործակցում կենտրոնի հետ, նաև ցավ հայտնեց, որ անցած տարվա ապրիլյան պատերազմական իրադարձությունները կասեցրին Բերձորի մասնակցությունը օլիմպիադային: Ելույթներից հետո օլիմպիադան ավարտվեց:

Վերադարձից առաջ բերձորցիներն այցելեցին Մատենադարան, Արարատի մարզի  Զանգակատուն գյուղում հյուրընկալվեցին Պարույր Սևակի տուն-թանգարանում, ծանոթացան մեծ գրողի ծննդավայրին, շրջեցին նրա ստեղծած այգում, ծաղիկներ խոնարհեցին բանաստեղծի, նրա կնոջ և ծնողների շիրիմներին: Առաջին օրը՝ մինչ Երևան հասնելը, եղավ այցելություն Նորավանք: 

Վահան Թեքեյանի անվան 4 հանրակրթական դպրոց կա Հայաստանի Հանրապետությունում՝ Երևանում, Գյումրիում, Ստեփանավանում, Կարբի գյուղում, իսկ հինգերորդն Արցախի Հանրապետության Քաշաթաղի շրջկենտրոն Բերձորի թիվ 1 միջնակարգն է: