Մեկնարկում է «Իմ ֆինանսների ամիս-2017» ծրագիրը

ՀՀ կենտրոնական բանկը` համագործակցելով մի շարք ֆինանսական կառույցների հետ, մեկնարկում է «Իմ ֆինանսների ամիս-2017»  ծրագիրը: «Արմենպրես»-ի հաղորդմամբ` արդեն 4-րդ տարին իրականացվող ծրագրի նպատակն է հասարակության շրջանում անձնական ֆինանսների արդյունավետ կառավարման կարեւորումը եւ ֆինանսական կրթման մակարդակի բարձրացումը:

ՀՀ կենտրոնական բանկի սպառողների շահերի պաշտպանության եւ ֆինանսական կրթման կենտրոնի ղեկավար Արմենուհի Մկրտչյանի խոսքով` Կենտրոնական բանկն ընդգծում է ֆինանսական կրթման կարեւորությունը: «Մենք այս տարի իրականացնելու ենք ոչ միայն հասարակության կողմից արդեն սիրված, այլեւ նոր միջոցառումներ: Օրինակ` այս տարվա նորություններից են ակումբային քննարկումները, որոնք իրականացվելու են Ավանդների երաշխավորման հիմնադրամի նախաձեռնությամբ»,-ասաց նա:

«Ֆինանսական ֆուտբոլ» խաղը, որը դեռեւս փետրվար ամսին է մեկնարկել, կխրախուսի տարբեր տարիքային խմբերի մարդկանց, որպեսզի խաղան եւ ավելի բարձրացնեն իրենց գիտելիքները:  «Դպրոցականների համար մենք ունենք ֆինանսատնտեսական խաղ- մրցույթը: Ուսանողների համար բանավեճերի միջհամալսարանական  մրցաշար է իրականացվելու»,-ասաց Արմենուհի Մկրտչյանը` բոլորին կոչ անելով շտապել գրանցվել, քանի որ տեղերը սահմանափակ են: «Մասնակցությունն անվճար է: Պահանջվում  է միայն ժպիտ եւ պատրաստակամություն»,-հավելեց նա:

ՀՀ կենտրոնական բանկի խորհրդի անդամ Արմենակ Դարբինյանն էլ նշեց, որ ծրագրի միջոցառումներն ուղղված են լինելու գիտելիքների եւ հմտությունների ուժեղացմանը: «Հարկավոր է ջանքեր գործադրել, որպեսզի հասարակությունն ավելի հստակ պատկերացում կազմի ֆինանսական կառույցների եւ նրանց կողմից մատուցվող ծառայությունների մասին»,-ասաց Դարբինյանը:

«Իմ ֆինանսների ամիս-2017»  ծրագրի շրջանակում միջոցառումները կկազմակերպվեն ապրիլի 19-ից մայիսի 26-ը: