Հանրակրթական դպրոցներում ֆինանսական եւ ձեռնարկատիրական կրթությունը կներդրվի եկող տարվանից

Հանրակրթական դպրոցներում Ֆինանսական եւ ձեռնարկատիրական կրթությունը կներդրվի 2018 թվականից: «Արմենպրես»-ի հաղորդմամբ` ՀՀԿԳՆ  հանրակրթության վարչության  նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանի խոսքով` այդ ուղությամբ աշխատանքներն ընթանում են դեռ 2014 թվականից: «Ծրագրի ներդրման արդյունքում 2-12-րդ դասարանների երեխաներին կսովորեցնեն ֆինանսապես գրագետ քաղաքացի մեծանալու բոլոր գաղտնիքները»,-ասաց նա:

Մակյանը նշեց, որ արդեն իսկ մշակված ծրագիրը քննարկվել է միջազգային փորձագետների հետ: «Մենք ունենք «Տեխնոլոգիա»,  «Ես եւ շրջակա աշխարհը», «Մաթեմատիկա», «Հանրահաշիվ»  եւ «Հասարակագիտություն» առարկաների այն բաժինը,  որը ներառում է ֆինանսական եւ ձեռնարկատիրական կրթության տարրեր: Նախատեսում ենք քննարկումների վերջնական գործընթացն իրականացնել  մինչեւ ապրիլի 30-ը»,-ասաց նա` հավելելով, որ հաջորդ քայլը լինելու է ուսուցիչների վերապատրաստման գործընթացը:

 «Այս բոլոր փուլերն անցնելուց հետո, սեպտեմբերին որոշակի դպրոցներում փորձնական ծրագիր կունենանք»,-հավելեց ԿԳՆ ներկայացուցիչը: