Աշնանացանը դիմացել է խստաշունչ սառնամանիքներին

Գեղարքունիքի մարզի տնտեսություններում  2016 թվականի աշնանը ցանվել է 19 հազար 300 հեկտար աշնանացան ցորենի ցանք, որը հիմնականում դիմացել է անցած ձմռան տեւական ու խստաշունչ ցրտերին: Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի գյուղատնտեսության եւ բնապահպանության վարչությունից, ավելի վաղ ցանված եւ ինչեւ ձմռան սկիզբը ծլած ցանքերը հիմնականում կենսունակ են, իսկ այն տարածքներում, որտեղ ավելի ուշ է ցանք կատարվել, եւ սերմը ձմեռվանից առաջ չի հասցրել ծլել, իրավիճակը կհստակեցվի առաջիկա օրերի ընթացքում: Մեծ Մասրիկի գյուղապետարանից ստացված տվյալներով՝ գյուղի տնտեսություններում ցանվել է 850 հեկտար աշնանացան, որը դիմացել է ձմռան ցրտերին: «Աշնանացան ցորենի ցանքերը, կարելի է ասել, հաջող են ձմեռել եւ հիմա կենսունակ են հետագա աճի եւ զարգացման համար: Շուտով սկսելու ենք սնուցման աշխատանքները: Նվազ կենսունակություն է նկատվում մոտ 400 հեկտար կորն գանի ցանքերում, որտեղ առայժմ բավարար ծլունակություն չի նկատվում: Անկասկած է, որ կորնգանի բերքն այս տարի նվազ կլինի, քանի որ ցուրտ եղանակն, այնուամենայնիվ, իր վատ գործն արել է»,-ներկայացրեց Մեծ Մասրիկի գյուղապետարանի աշխատակազմի քարտուղար Էդիկ Պողոսյանը: Նորակերտի գյուղապետ Գերասիմ Սարգսյանը եւս հավաստեց, որ իրենց մոտ կատարված 500 հեկտար աշնանացանը հաջող ձմեռում է անցկացրել, իսկ ահա կորնգանի ցանքերի ներկա վիճակը մտահոգության տեղիք է տալիս: