Ամուսնալուծությունների ամենաբարձր ցուցանիշը Լոռու մարզում է

Հայաստանում ամուսնալուծությունների թիվը վերջին երկու տարիներին նվազում է, սակայն այն 2001 թվականի համեմատ դեռ շարունակում է բարձր մնալ: Այս մասին «Արմենպրես»-ի մամուլի սրահում հրավիրված ասուլիսում նշեց Հայաստանի ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջանը:

1990-1991 թվականներին հանրապետությունում գրանցվել է 3 հազար 800 ամուսնալուծություն, 2001 թվականին այդ ցուցանիշը նվազել է` դառնալով գրեթե 1300: Այնուհետև ամուսնալուծությունների թիվը սկսել է բարձրանալ, ամենաբարձր ցուցանիշը  եղել է 2014 թվականին, երբ գրանցվել է 4 հազար 496 դեպք:

«2015 թվականին ունեցել ենք ամուսնալուծության 3 հազար 670 դեպք, իսկ 2016-ին` 3 հազար 648 դեպք: Ինչպես տեսնում եք, որոշակի նվազում կա, սակայն այս ցուցանիշը շարունակում է բարձր մնալ 2001 թվականի համեմատ, երբ ունեցանք ամուսնալուծության մոտ 1300 դեպք: Եթե դիտարկենք հարաբերական ցուցանիշը, ապա ամուսնալուծության դեպքերը 1000 բնակչի հաշվով կազմում են 1,2 գործակից»,-ասաց Կարինե Կույումջյանը: Այս ցուցանիշը համեմատելով Ադրբեջանի, Ռուսաստանի, Բելառուսի և տարածաշրջանի այլ երկրների հետ` Կարինե Կույումջյան նշեց, որ այդ երկրներում ամուսնալուծությունների թիվն ավելի մեծ է:

Հայաստանում ամուսնալուծությունների ամենաբարձր ցուցանիշը Լոռու մարզում է: Ամուսնալուծության միջին հանրապետական ցուցանիշը 1,2 պրոմիլ է, Լոռիում այդ ցուցանիշը կրկնակի ավելին է՝ կազմելով 2,4: Մյուս մարզերում այդ ցուցանիշը միջին հանրապետականից ցածր է:

Ինչ վերաբերում է ամուսնություններին, ապա մեր երկրում 90-ական թվականների սկզբին գրանցվում էր ավելի քան 28 հազար ամուսնություն: 2001 թվականին այդ ցուցանիշը դարձավ 11 հազար: Դրան հաջորդող տասնամյակում ամուսնությունների թիվն ավելացավ, 2011 թվականին գրանցվեց 19 հազար 706 ամուսնություն: Վերջին 3-4 տարիների ընթացքում որոշակի նվազում նկատվում է, 2016 թվականին գրանցվել է 16 հազար 294 ամուսնություն:

Խոսելով ամուսնությունների տարիքային խմբերի մասին՝ Կարինե Կույումջյանը նշեց, որ ամուսնության միջին տարիքը վերջին 20 տարիների ընթացքում տղամարդու դեպքում 25-ից հասել է 29-ի, կանանց դեպքում` 22-ից հասել է 26-ի: