Ուշ թե շուտ Հայոց ցեղասպանությունը պետք է վերջնականապես ճանաչվի, որովհետեւ այլ ճանապարհ չկա. Շարմազանով

Թուրքիայում վերջին սահմանադրական փոփոխությունները ցույց տվեցին, որ Էրդողանի սուլթանության ժամանակաշրջանը շարունակվում է եւ Թուրքիայի հասարակության համար խորանում է սեփական պատմության հետ հաշտվելու անջրպետը:

«Արմենպրես»-ի հաղորդմամբ՝ Ծիծեռնակաբերդի հուշահամալիրում այս մասին ասաց ՀՀ ԱԺ փոխնախագահ Էդուարդ Շարմազանովը: Նրա խոսքով` Թուրքիան գնաց ժխտողականությունն ավելի խորացնելու ճանապարհով եւ հեռացավ սեփական պատմության հետ հաշտվելու ճանապարհից: «Այսօր մշուշոտ է նմանատիպ հարեւանի հետ հաշտության լեզվով խոսելը եւ ակնկալելը, որ Էրդողանի վարչակազմը կարող է ճանաչել Հայոց ցեղասպանությունը: Դժվար է ակնկալել, որ այդ երկրի վարչակազմը կարող է այդքան խիզախություն ունենալ ու հաշտվել սեփական պատմոթյան հետ: Բայց ի հակառակ դրա, մենք տեսնում ենք, որ հանուն մարդու իրավունքների պաշտպանության ավելանում են երկրները, մտավորականները, եւ ընդհանրապես տարբեր մարդիկ, ովքեր ճանաչում եւ դատապարտում են Հայոց ցեղասպանությունը»,-ասաց Շարմազանովը:

Նա նշեց, որ ուշ թե շուտ Հայոց ցեղասպանությունը պետք է վերջնականապես ճանաչվի, որովհետեւ այլ ճանապարհ չկա: Դատապարտողները լույսի համար մարտնչողներն են, իսկ ժխտողները ստվերի կողմնակիցները:

Ապրիլի 24-ին աշխարհասփյուռ հայությունը նշում է Հայոց ցեղասպանության 102-րդ տարելիցը: Հայ ժողովուրդը, երկրի բարձրաստիճան պաշտոնյաներն ու Հայաստան ժամանած հյուրերը ապրիլի 24-ին Ծիծեռնակաբերդի բարձունքում են՝ հարգանքի տուրք մատուցելու Հայոց ցեղասպանության զոհերի հիշատակին:

Օսմանյան կառավարության կողմից իրականացված Հայոց ցեղասպանության փաստը հիմնավորվել է, ճանաչվել ու հաստատվել ականատեսների վկայություններով, օրեքներով, բանաձեւերով եւ բազմաթիվ նահանգների ու միջազգային կազմակերպությունների որոշումներով: 1915թ. Օսմանյան կայսրությունում հայ բնակչության մասայական կոտորածները որպես նախապես ծրագրավորված ու ամբողջությամբ իրագործված ցեղասպանական ակտ որակող փաստաթղթերի ամբողջական շարքը հսկայական է: Հայոց ցեղասպանությունն ընդունել են այնպիսի կազմակերպություններ, ինչպիսիք են Եվրոպայի Խորհուրդը, Եվրախրհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային միությունը, Հարավային Ամերիկայի խոշորագույն կազմակերպություններից մեկի` ՄԵՐԿՈՍՈւՐ-ի խորհրդարանը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ.: Հայ ժողովրդի կոտորածը պաշտոնապես դատապարտել եւ ճանաչել են որպես ցեղասպանություն` ըստ միջազգային իրավունքի, հետեւյալ երկրները` Ֆրանսիա, Իտալիա, Բելգիա, Նիդեռլանդներ, Շվեյցարիա, Շվեդիա, Ռուսաստան, Լեհաստան, Լիտվա, Հունաստան, Սլովակիա, Կիպրոս, Լիբանան, Ուրուվայ, Պարագվայ, Արգենտինա (2 օրենք, 5 բանաձեւ), Վենեսուելա, Չիլի, Բոլիվիա, Կանադա, Վատիկան, Ավստրիա, Լյուքսեմբուրգ, Գերմանիա, Ավստրալիայի Նոր Հարավային Ուելս նահանգը, ԱՄՆ 45 նահանգներ: