Մենք բոլորս պահանջատեր ենք. Հայաստանի ասորական համայնքը հարգանքի տուրք մատուցեց Ցեղասպանության զոհերի հիշատակին

 Հայաստանի «Աթուր» ասորական միության նախագահ Արսեն Միխայիլովը նախադրյալներ տեսնում է, որ Թուրքիան վաղ թե ուշ ճանաչելու է Հայոց ցեղասպանությունը: Ծիծեռնակաբերդի հուշահամալիրում «Արմենպրես»-ի հետ զրույցում Միխայիլովն ընդգծեց, որ գալու է ժամանակը, երբ աշխարհը ոտքի կկանգնի, և Թուրքիան ստիպված կլինի ճանաչել Հայոց ցեղասպանությունը:

«Այն, ինչ Թուրքիան 20-րդ դարի սկզբին պետական մակարդակով իրականացրեց հայ, ասորի և հույն ժողովուրդների նկատմամբ, բարբարոսություն է: Մենք դատապարտում ենք և պետք է մեր ձայնը բարձրացնենք, որպեսզի աշխարհը տեսնի, թե իրականում ինչ է կատարվել և ճանաչի Հայոց ցեղասպանությունը: Մենք բոլորս այս հարցում պահանջատեր ենք»,- նշեց նա:

Միխայիլովն ընդգծեց, որ գրեթե ողջ ասորական համայնքն ապրիլի 24-ին Ծիծեռնակաբերդի հուշահամալիր է այցելել հարգանքի տուրք մատուցելու Հայոց ցեղասպանության զոհերի հիշատակին:

Օսմանյան կառավարության կողմից իրականացված Հայոց ցեղասպանության փաստը հիմնավորվել է, ճանաչվել ու հաստատվել ականատեսների վկայություններով, օրենքներով, բանաձեւերով եւ բազմաթիվ նահանգների ու միջազգային կազմակերպությունների որոշումներով:

1915թ. Օսմանյան կայսրությունում հայ բնակչության մասսայական կոտորածները որպես նախապես ծրագրավորված ու ամբողջությամբ իրագործված ցեղասպանական ակտ որակող փաստաթղթերի ամբողջական շարքը հսկայական է: Հայոց ցեղասպանությունն ընդունել են այնպիսի կազմակերպություններ, ինչպիսիք են Եվրոպայի Խորհուրդը, Եվրախորհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային միությունը, Հարավային Ամերիկայի խոշորագույն կազմակերպություններից մեկի` ՄԵՐԿՈՍՈւՐ-ի խորհրդարանը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ.: Հայ ժողովրդի կոտորածը պաշտոնապես դատապարտել եւ ճանաչել են որպես ցեղասպանություն` ըստ միջազգային իրավունքի, հետեւյալ երկրները` Ֆրանսիա, Իտալիա, Բելգիա, Նիդեռլանդներ, Շվեյցարիա, Շվեդիա, Ռուսաստան, Լեհաստան, Լիտվա, Հունաստան, Սլովակիա, Կիպրոս, Լիբանան, Ուրուգվայ, Պարագվայ, Արգենտինա (2 օրենք, 5 բանաձեւ), Վենեսուելա, Չիլի, Բոլիվիա, Կանադա, Վատիկան, Ավստրիա, Լյուքսեմբուրգ, Գերմանիա, Ավստրալիայի Նոր Հարավային Ուելս նահանգը, ԱՄՆ 45 նահանգներ: