Գնդասեղով հող փորել. Թուրք գործիչը Թուրքիայում Հայոց ցեղասպանության թեմայով կարծրատիպը կոտրելու մասին

 Հայոց ցեղասպանության հարցի հետ կապված Թուրքիայում խորն արմատներով կարծրատիպ կա: Տարիներ շարունակ թուրքական պետությունն աշխատել է այդ ուղղությամբ: Հայոց ցեղասպանության զոհերի հիշատակին հարգանքի տուրք մատուցելու նպատակով Հայաստանում գտնվող Թուրքիայի քաղաքացի, գերմանաբնակ Էլիֆ Սելայ Էրթեմը նշեց, որ տարիներ շարունակ սերունդները կեղծիքի մեջ են մեծացել:

«Թուրքական պետությունը 102 տարի անընդհատ տարբեր մակարդակներում ներկայացրել է, որ ցեղասպանություն չի եղել: Ուսումնական հաստատություններում երեխաներին, երիտասարդներին սուտն է ներկայացվել: Մի քանի սերունդ լավ չի պատկերացնում, թե 1915 թվականին ինչ է կատարվել»,-«Արմենպրես»-ի հաղորդմամբ՝ ասաց Էլիֆ Սելայ Էրթեմը:

Նա, ով Գերմանիայում գործող «Միություն ընդդեմ ցեղասպանության» կազմակերպության անդամ է, նշեց, որ իրենք 1998 թվականից սկսած բարձրաձայնում են իրողությունը, սակայն այդ հսկայական խորն արմատներով կարծրատիպի պարագայում հասարակության մեջ դժվար է լուրջ առաջընթաց արձանագրելը:

«Գիտեք, մեր գործունեությունը կարծես նման լինի գնդասեղով հող փորելուն: Այսինքն` շատ դժվար է այդ ուրացման քաղաքականությունը կոտրելը: Այո, դրականը քիչ է, 1998 թվականից այս կողմ մեր շարքերը մեծ թվով մարդկանցով չեն համալրվել, բայց մենք կարծում ենք, որ պայքարը պետք է շարունակել»,-ասաց Էլիֆ Սելայ Էրթեմը:

Գերմանիայում գործող «Միություն ընդդեմ ցեղասպանության» կազմակերպության Նիլգուն Քայանի խոսքով, Թուրքիայում պետական մակարդակով ուղեղների լվացման գործընթաց է արվել: Թուրքիա պետությունն այդ կեղծիքի, ստի հիման վրա է ստեղծվել, հետևաբար կարծրատիպը կոտրելը շատ բարդ է:

«Այո, դրական միտումները քիչ են, սակայն գլոբալիզացիայի պայմաններում, Թուրքիան չի կարող մեկուսացած մնալ, արտաքին հանգամանքները կարող են ազդել երկրում առկա մթնոլորտի վրա: Ի վերջո, Թուրքիայում միայն թուրքեր չեն, կան բազմաթիվ այլ ազգեր և դրսի օժանդակությամբ հնարավոր է փոփոխություններ լինեն»,-ավելացրեց նա: