Շառից հեռու. Սիսիանի քաղաքապետի եղբայրը խուսափում է տոնել հաղթանակը. «Փաստ»

«Փաստ» օրաթերթը գրում է.

Սյունիքից առաջադրված ՀՀԿ ռեյտինգային թեկնածու, «Հիդրո» շինարարական ընկերության սեփականատեր Ավետ Սարգսյանը, ով Սիսիանի քաղաքապետ Արթուր Սարգսյանի եղբայրն է ու 4661 ձայն է ստացել ընտրություններում, ի տարբերություն Սյունիքից ՀՀԿ մեկ այլ ռեյտինգային թեկնածու, 26–ամյա Առուշ Առուշանյանի, չի շտապել տոնել հաղթանակը ու քեֆ չի կազմակերպել: Չի բացառվում, որ նա խուսափել է կրկնել Առուշանյանի «սխալը»:

Հիշեցնենք, որ Սյունիքից ՀՀԿ ռեյտինգային թեկնածու, «Առանցք» ընկերության հիմնադիր Գագիկ Առուշանյանի տղան՝ Առուշ Առուշանյանը, ով ստացել է 6879 ձայն, ապրիլի 7–ի ուշ երեկոյան տոնել էր սեփական հաղթանակը, ինչն ավարտվել էր Գորիսի բնակիչ Շահում Դավթյանի տանը տեղի ունեցած վեճով, ու ՀՀԿ թեկնածուն հայտնվել էր ոստիկանությունում: Արդյունքում, «Փաստին» հասած տեղեկություններով, խորհրդարան է գնալու ոչ թե Առուշ Առուշանյանը, այլ Ավետ Սարգսյանը, ով էականորն պակաս ձայն է հավաքել Առուշանյանից: Երիտասարդ թեկնածու Առուշ Առուշանյանը երեկ այդպես էլ չպատասխանեց մեր հեռախոսազանգերին:

Չնայած մարզում խոսակցություններ կան նաև, որ Սյունիքի մարզպետը հրաժեշտ է տալու պաշտոնին՝ դառնալով պատգամավոր, «Փաստի» տեղեկություններով, Վահե Հակոբյանը մնալու է մարզպետի պաշտոնում, ու նրա փոխարեն ԱԺ է գնալու Ավետ Սարգսյանը:

49–ամյա Ավետ Սարգսյանը գործարար շինարար է, «Հիդրո» ընկերության հիմնադիրը:

«Փաստը» մի քանի հարց ուղղեց նրան:

– Պարոն Սարգսյան, պատգամավոր դառնալու Ձեր շանսերն ինչպե՞ս եք գնահատում, հատկապես որ տեղեկություն կա, Դուք եք դառնալու Սյունիքից ՀՀԿ պատգամավորը, քանի որ Առուշ Առուշանյանը չի լինելու:

– Ես հիմա չեմ կարա ասեմ, ժամանակը երբ կգա, կիմանաք: Ժամանակը ցույց կտա:

– Իսկ Դուք փորձե՞լ եք Ձեր հաղթանակը նշել, ինչպես դա արել էր Առուշանյանը:

– Չէ, ոչ, մենք հաղթանակը չենք նշել: ՀՀԿ–ն որ հաղթել է, էդ հաղթանակ է, ուրիշ հաղթանակ մենք չենք նշել:

– Հնարավո՞ր է Առուշ Առուշանյանի օրինակով եք խուսափում հաղթանակ նշել, քանի որ իր դեպքում վեճ եղավ ու, փաստորեն, ինքը չի դառնալու պատգամավոր:

– Ճիշտն ասած՝ մենք նման խնդիր չունենք, որ վեճ լինի կամ խոսակցություն լինի, ոչ էլ մտադրություն կա, որ կարող է վեճ լինի, մենք ոչ մի խնդիր չունենք: Էսքան տարի մենք ինչ արել ենք, առանց վեճի ենք արել: Ամեն մարդ իրա կարծիքն ունի: Ժամանակը որ եկավ, կնշենք: Առաջ չենք ընկնում:

– Եվ Դուք պատրաստ եք գալ, պատգամավոր աշխատել Երևանում:

– Ես խնդիր չունեմ: Աշխատելու հետ խնդիր չունեմ: Աշխատանքից չենք վախենում: Հիմա չեմ կարող ասել, ժամանակը կգա, կասենք:

– Իսկ վերջին շրջանում Առուշ Առուշանյանի հետ շփվե՞լ եք, իր տրամադրությունն ինչպե՞ս է:

– Ընտրություններից հետո իրան չեմ տեսել, չենք հանդիպել: Կարող եք զանգել, իրենից հարցնել՝ իր տրամադրությունը ոնց է: Ես մի քանի անգամ եմ շփվել Առուշանյանի հետ՝ նորմալ անձնավորություն է, նորմալ տղա:

– Կարծում եք՝ միայն այդ վեճի համա՞ր է նա «պատժվում»:

– Բայց ո՞վ ա ասել, որ ինքը պատժվում ա: Ես տեղյակ չեմ, չեմ կարա պատասխանեմ, ոչ քննիչ եմ, ոչ դատավոր:

– Այսօր Սյունիքում լարվածություն չկա՞ ՀՀԿ թեկնածուների միջև:

– Բայց ինչի՞ պետք ա լարվածություն լինի: Արդար, մաքուր ընտրություն ա եղել: