Աննկարագրելի համեղ տորթ փխրուն շերտերով և բերանում հալչող շոկոլադե կրեմով

ԼԱՅՖ 26 Ապրիլ, 2017 14:41

Բաղադրիչներ

Շերտերի համար՝
ալյուր - 300 գր
կարագ - 75 գր
ձու - 1 հատ
շաքարավազ - 100 գր
թթվասեր - 2 ճ/գդ
փխրեցուցիչ - 1 թ/գդ
վանիլին - 0.5 թ/գդ
Փուդինգային կրեմի համար՝
ձու - 1 հատ
շաքարավազ - 100 գր
կակաո - 1 ճ/գդ
շոկոլադ կաթնային - 100 գր
կաթ - 600 մլ
օսլա (крахмал) - 3 ճ/գդ
Ջնարակի համար՝
կակաո - 2 ճ/գդ
շաքարավազ - 2 ճ/գդ
կարագ - 50 գր
թթվասեր - 3 ճ/գդ (բարձր յուղայնությամբ)

Պատրաստման եղանակ

Չափաբաժինները՝ 8-10:
Փափկեցրած կարագը շաքարավազի և վանիլինի հետ տրորում ենք, մինչ ստանանք համասեռ զանգված: Ավելացնում ենք թթվասերը, ալյուրը, փխրեցուցիչը, ձուն ու խմոր հունցում: Ըստ անհրաժեշտության ալյուր ենք ավելացնում, որպեսզի ստանանք ձեռքերին չկպչող և հարթ խմոր:
Խմորը կիսում ենք 5 հավասար կտորների:
Յուրաքանչյուրը կտորն ալրապատ սեղանի վրա բավական բարակ շրջանաձև գրտնակում ենք, այնուհետև կտրում 20 սմ տրամագծով ամանի չափով: Դնում ենք յուղաթղթապատ ձևամանի մեջ, պատառաքաղով ծակծկում ենք և 200 աստիճան տաքացրած ջեռոցում մոտ 8 րոպե թխում, մինչև ստանանք ոսկեգույն երանգ:
Պատրաստի շերտերն իրար վրա ենք շարում:
Պատրաստում ենք կրեմը: Շաքարավազը, ձուն ու կակաոն լցնում ենք ամանի մեջ և տրորում ենք: Ահա այսպիսի թանձր զանգված ենք ստանում:
Ավելացնում ենք 400 մլ կաթ և դնում միջին ուժեղության կրակի վրա:
Կտրատած շոկոլադը լցնում ենք զանգվածի մեջ և խառնում մինչև այն լուծվի: Թույլ կրակի վրա փայտե գդալով անընդհատ խառնելով զանգվածը եփում ենք, մինչև հասնի եռման աստիճանի:
Մնացած 200 մլ կաթի մեջ օսլա ենք լցնում և խառնում: Այնուհետև օսլայով զանգվածը լցնում ենք շոկոլադե զանգվածի մեջ և անընդհատ խառնելով մի քանի րոպե եփում մինչև թանձրանա (կրեմը շատ արագ է թանձրանում):
Կրեմը թեթևակի սառեցնում ենք և դեռ տաք վիճակում քսում շերտերի վրա (եթե շատ սառեցնենք, ապա այն կթանձրանա): Շերտերը ևս պետք է տաք լինեն: Յուրաքանչյուր շերտի վրա 2.5-3 ճ/գդ կրեմ ենք լցնում:
Վերևամասում կրեմ չենք քսում: Տորթը թողնում ենք սենյակային ջերմաստիճանում, որպեսզի սառչի, այնուհետև 3-4 ժամով դնում ենք սառնարանը:
Ջնարակի համար նախատեսված բաղադրիչները լցնում ենք փոքր կաթսայի մեջ և միջին ուժեղության կրակի վրա եփում ենք մինչև համասեռ դառնա, այնուհետև սառեցնում ենք և լցնում տորթի վրա:
Կարող ենք 100 գր շոկոլադը հալեցնել, քսել փայլաթիթեղի վրա և սառեցնել, այնուհետև առանձնացնել փայլաթիթեղից և ձևավորել տորթը: