Դատարանը Հելմութ Կոլի կենսագիրներին պարտավորեցրել է նրան 1 մլն եվրո վճարել

Քյոլնի հողային դատարանը ապրիլի 27-ին բավարարել է Գերմանիայի նախկին կանցլեր Հելմուտ Կոլի հայցը՝ նրա կենսագիրներ Հերիբերտ Շվանին ու Թիլման Յենսին պարտավորեցնելով 1 մլն եվրոյի չափով փոխհատուցում վճարել նրան, հայտնում է DW-ը։

2014-ին Heyne Verlag –ը հրատարակել է «Կտակ․Կոլի հետ զրույցների արձանագրությունները» գիրքը։ Գիրքը պարունակում է նախկին կանցլերի մի շարք կտրուկ արտահայտություններ նրա նախկին համակիրների հասցեին, այդ թվում Գերմանիայի գործող կանցլեր Անգելա Մերկելի, որին Կոլը իր կաբինետի կազմում էր ներառել 1991-ին։

Հերիբերտ Շվանը նախկին կանցլերի կենսագրության վրա աշխատել է 2001-2002 թթ։ Նրանց 630 ժամ ընդհանուր տեւողության զրույցները ձայնագրվել են ու հիմք դարձել Հելմուտ Կոլի հուշերի համար։ Առաջին երեք հատորները հրատարակվել են, իսկ հետո չորրորդ ու հինգերորդ հատորների հրատարակումից որոշ ժամանակ առաջ Կոլն ու Շվանը վիճել են։ 2009-ին Գերմանիայի նախկին կանցլերը դադարեցրել է համագործակցությունը լրագրողի հետ, պահանջել է, որ նա վերադարձնի բոլոր ձայնագրությունները ու մի շարք մեջբերումներ հանի արդեն հրատարակման պատրաստված գրքերից։ Վերջինն էլ, սակայն, ինքնակամ հրատարակել է «Կտակ․ Կոլի հետ զրույցների արձանագրությունները» գիրքը։

 Քյոլնի հողային դատարանը որոշել է, որ հրատարակումը զգալի բարոյական վնաս է հասցրել 87-ամյա քաղաքական գործչին։ Այդուհանդերձ, դատավճիռը դեռ ուժի մեջ չի մտել։ Շվանն ու նրա համահեղինակը կարող են բողոքարկել այն վերադաս դատական ատյանում։