Հովհաննես Սահակյան. «Շնորհակալություն հայտնեք էն կամքին, որը ցուցաբերեցինք ընտրական գործընթացների հետ կապված». «Փաստ»

«Փաստ» օրաթերթը գրում է.

Չնայած խորհրդարանի ընտրությունների ժամանակ թե՛ պետական, թե՛ մասնավոր ընկերություններում աշխատակիցների ուղղորդման, իսկ ընտրության օրը ընտրակաշառք բաժանելու մասին ահազանգերին, ՀՀԿ պատգամավոր, ԱԺ պետաիրավական հարցերի հանձնաժողովի նախագահ Հովհաննես Սահակյանը «Փաստի» հետ զրույցում հայտարարում է, որ եթե հետընտրական զարգացումներ չեղան, ուրեմն նորմալ ընտրություններ են եղել:

Հովհաննես Սահակյանը չի լինելու նոր խորհրդարանում: Ներկայացնում ենք նրա հետ «Փաստի» զրույցը:

– Պարոն Սահակյան, Ձեր ապագան որոշվե՞ց, Դուք ո՞ր կառույցում եք լինելու:

– Էնպես չի, որ իմ ապագան անորոշ էր, հիմա էլ պետք է որոշվի: Երբ թիմի անդամ ես, թիմային աշխատանքի մեջ ես, իսկ ես 2002–ից ՀՀԿ անդամ եմ, ինչը ենթադրում է ապագայի հետ կապված թիմային որոշումների կայացում՝ կախված, թե որտեղ ավելի օգտակար կլինես թե՛ թիմին, թե՛ ժողովրդին: Մեր թիմը ոնց կորոշի, էդպես էլ կանենք:

– Այսինքն, դեռ որոշված չէ՞ Ձեր ապագա տեղը: Արդեն իսկ անուններ են շրջանառվում Ձեր ղեկավարած պետաիրավական հանձնաժողովը նախագահելու առթիվ՝ Ֆելիքս Ցոլակյան, Միհրան Պողոսյան և այլն:

– Ասեմ, որ կադրային հարցերի հետ կապված մեր կուսակցությունում թե՛ գործադիր մարմնում, թե՛ իմ հետ որևիցե մի կադրային հարց էս պահի դրությամբ չի քննարկվել: Ամեն ինչ իր ժամանակի մեջ կքննարկվի և՛ ԱԺ նախագահի տեղակալների, և՛ հանձնաժողովների նախագահների ու տեղակալների, և մնացած այլ պաշտոնների հետ կապված:

– Ստացվում է՝ Ձեր ծառայություններն ԱԺ–ում իշխանությանն այլևս պետք չե՞ն:

– Ես ասացի, որ թիմն է որոշում, երբ որ թիմի մեջ ես, թիմի ղեկավարն է որոշում, թե թիմի որ անդամը իր ուժերը, փորձը, գիտելիքները որտեղ կարող է օգտագործել և պիտանի լինել:

– Ասվում է, որ ՀՀԿ–ում անորոշություն է. թիմի անդամներին անորոշության մեջ պահելն ինչպե՞ս է ազդում ՀՀԿ–ականների հարաբերությունների վրա:

– Կադրային հարցերի վերաբերյալ, կարծում եմ, սպառիչ պատասխանեցի: Ամեն ինչ ունի իր ժամանակը: Գիտեք, որ ՀԱԿ–ը դիմել է Սահմանադրական դատարան, և դրա հետ կապված ժամկետների որոշակի փոփոխություն կա ԱԺ–ում: Չես կարող ՍԴ որոշումից առաջ ընկնել և որոշումներ կայացնել: Անորոշության հետ կապված որևէ խնդիր չկա:

– Այդ դեպքում ինչպես հասկանանք, որ նույն ՀՀԿ վերնախավը չի սպասում ՍԴ վճռին և ակտիվ բանակցում է Դաշնակցության հետ՝ ապագա կոալիցիայի ու պորտֆելների, պաշտոնների շուրջ:

 – Համեմատությունը սխալ է, պաշտոնների շուրջ չեն հանդիպումները, նախ՝ քաղաքական քննարկումները համագործակցության շրջանակների շուրջ են: Եվ եթե նույնիսկ պաշտոնների շուրջ էլ են, դա չի նշանակում, որ էդ պաշտոններին հենց վաղը նշանակելու են: Իրավական առումով որևէ գործընթաց տեղի չի ունենում: Այսինքն, մենք ոչ մեկի հետ չհանդիպե՞նք, ոչ մի բան չխոսե՞նք:

– Պարոն Սահակյան, խորհրդարանի ընտրությունների ժամանակ բազմաթիվ ահազանգեր եղան ուղղորդումների և ընտրակաշառք բաժանելու դեպքերի առթիվ: Սա նշանակո՞ւմ է, որ ՀՀԿ–ն ի զորու չէ փոխել ընտրվելու իր մարտավարությունը ու հրաժարվել ընտրակաշառքից:

– Մենք գիտենք, որ ընտրությունների հաջորդ օրը նույնիսկ էն ավանդական հավաքվել, բողոք՝ անկախ կա՞ որևէ խախտում, թե՞ չկա, նույնիսկ նման գործընթաց տեղի չունենցավ: Նախ՝ դա գալիս է նաև նրանից, որ Ընտրական օրենսգիրքը կազմելու ժամանակ մենք նորմալ բազա՝ գործիքակազմ ստեղծեցինք՝ նորմալ ընտրություններ կազմելու և անցկացնելու համար: «4+4+4» ձևաչափով մենք քննարկեցինք և ընդառաջեցինք գրեթե բոլոր առաջարկներին, այդ թվում՝ ստորագրված ցուցակների հրապարակմանը, իրավական առումով ամրագրել ենք, և մենք տեսանք, որ ցանկության դեպքում բոլոր մասնակիցները կարող են վերահսկել և վերահսկեցին ընտրական գործընթացները: Եվ տեսանք, որ որևէ ահազանգ, որևէ խնդիր չի եղել:

– Ահազանգերը բազմաթիվ էին, թե՛ պետական ու մասնավոր հատվածում ուղղարդելու, թե՛ ընտրակաշառքի առթիվ:

– Ընտրակաշառքների մասով իրավապահ մարմինները ստեղծել էին թեժ գիծ և արագ արձագանքման խումբ: Ոչ միայն արձագանքները, այլև մամուլում հրապարակումները ուսամնասիրվել և ուսումնասիրվում են, որոնց հետ կապված կներկայացվեն նաև վերջնական տեսակետներ: Հետընտրական պրոցեսները մինչ օրս եղել են շատ դաժան, շատ բուռն և այլն, էս դեպքում մենք տեսանք, որ որևէ հետընտրական պրոցես չկա: Սա ընտրությունների լավագույն գնահատականն է:

– Ասել է թե՝ իշխանությունը պետք է շնորհակալություն հայտնի ընդդիմությանը՝ Սեյրան Օհանյանին, ՕՐՕ–ին, ՀԱԿ–ին և մյուսներին, որ հետընտրական զարգացումներ չեղա՞ն:

– Չէ, շնորհակալություն հայտնեք ԸՕ–ի վրա օր ու գիշեր աշխատողներին, շնորհակալություն հայտնեք էն կամքին, որը ցուցաբերեցինք ընտրական գործընթացների հետ կապված: Հիմա ՕՐՕ–ն կամ մյուսը, եթե փաստեր չկան, ի՞նչ անեն:

Շարունակությունը` «Փաստ» օրաթերթի այսօրվա համարում: