Հակառակորդի սադրանքներին գյուղացիները ծանոթ են. կրակոցից, գնդակոծությունից խուճապի չեն մատնվում. Կոթիի գյուղապետ

Tert.am-ը գրում է

Այս պահին համեմատաբար իրավիճակը խաղաղ է, հակառակորդը գիշերը կրակոցներ չի արձակել: Tert.am-ի հետ զրույցում այս մասին ասաց Տավուշի մարզի Կոթի համայնքի ղեկավար Ֆելիքս Մելիքյանը՝ հավելելով, որ գյուղի բնակիչները միշտ զգոն են, հրետակոծությունից, կրակոցներից խուճապի չեն մատնվում:

«Ապրիլի 28-ին հակառակորդի կողմից մեր գյուղի վրա գնդակոծությունը մեկ ժամ է տևել, բարեբախտաբար, միայն տներ, շինություններ են վնասվել, մարդիկ կարողացել են իրենց առօրյան հարմարեցնել այսպիսի իրավիճակներին, քանի որ լավ գիտեն՝ գործ ունենք Ադրբեջանի հետ, որը ամեն վայրկյան պատրաստ է հրադադարի ռեժիմը խախտել, կրակել  խաղաղ բնակիչների ուղղությամբ»,- ասաց համայնքապետը:

Կոթիի գյուղապետի խոսքով՝ Ադրբեջանը սադրանքների միջոցով փորձում է հիշեցնել սահմանին իր ներկայության մասին, բայց արագ լռեցվում է:

«Բացի դրանից՝ քիչ չեն դեպքերը, երբ Ադրբեջանի դիպուկահարները սկսում են կամայական կրակոցներ արձակել, ադրբեջանական բանակում ակնհայտ է, որ  կարգ ու կանոն չկա, ձեռագրին ծանոթ ենք»,- ասաց գյուղապետը:

Նա նշեց, որ սովորաբար գյուղատնտեսական աշխատանքների ակտիվացման ժամանակահատվածում հակառակորդն օրերով է նման գործողությունների դիմում, իսկ այս պարագայում իրավիճակն այլ էր, գործողությունները գիշերն էին, երբ ոչ մի գյուղատնտեսական աշխատանք չէր արվում:

Հիշեցնենք, որ ապրիլի 28-ի երեկոյան հակառակորդը կրակ էր բացել Տավուշի մարզի Բաղանիս ու Կոթի գյուղերի վրա: Tert.am-ի հետ զրույցում ՀՀ պաշտպանության նախարարի մամուլի խոսնակ Արծրուն Հովհաննիսյանը նշել էր, որ ադրբեջանական զինուժը կրակել է հիմնականում այս տարածքում տեղակայված հայկական խրամատների ուղղությամբ, բայց գյուղերն էլ անմասն չեն մնացել: 

Tert.am-ի հետ զրույցում Բաղանիսի գյուղապետ Նարեկ Սարգսյանը տեղեկացրել էր, որ 4-5 տուն է վնասվել և մեքենա: