ԵԿՄ Նոր Նորքի տարածքային բաժանմունքի կողմից բացվեց Արցախյան ազատամարտին նվիրված Փառքի սրահը

Orer.am-ը գրում է.

Այսօր Երկրապահ կամավորականների միության Նոր Նորքի տարածքային բաժանմունքի կողմից հանդիսավոր արարողությամբ բացվեց Արցախյան ազատամարտին նվիրված Փառքի սրահը, որին ներկա էին ԵԿՄ նախագահ Մանվել Գրիգորյանը, Երևանի քաղաքապետ ԵԿՄ անդամ Տարոն Մարգարյանը, Նոր Նորք վարչական շրջանի ղեկավար Արմեն Ուլիխանյանը:

Բաժանմունքի բակում հյուրերին ջերմ ողջյուններով եւ պարային բեմադրությամբ դիմավորեցին վարչական շրջանի փոքրիկները: Բացման արարողության ժամանակ ԵԿՄ տարածքային կառույցի ղեկավար Արամ Պողոսյանը, շնորհակալություն հայտնելով ԵԿՄ նախագահին, քաղաքապետին եւ մյուս ներկաներին հրավերն ընդունելու համար, ասաց. «Այսօր Նոր նորք վարչական շրջանի ԵԿՄ տարածքային բաժանմունքում Արցախի հերոս, գեներալ-լեյտենանտ Մանվել Գրիգորյանի հանձնարարականի համաձայն՝ կբացվի Փառքի սրահ՝ նվիրված զոհված ազատամարտիկների հիշատակին: Խոնարհվում եմ բաժանմունքի զոհված ազատամարտիկների հարազատների ու ընտանիքների առաջ` հայտնելով շնորհակալություն: Մեր մարտական ընկերները զոհվեցին հերոսաբար` Արցախի ազատագրման, մեր ազգի բարօրության ու վաղվա օրվա համար: Այդ տղաները հավերժ կմնան բազմադարյան պատմության էջերում»,-ասաց Ա. Պողոսյանը՝ համոզմունք հայտնելով, որ այսպիսի սրահների առկայությունը նպաստելու է երիտասարդ սերնդի ազգային գիտակցության բարձրացմանը:

Փառքի սրահի բացումից, ԵԿՄ վարչության հոգեւոր սպասարկող Հայր Անդրանիկ Գեւորգյանի օրհնության կարգից ու ԵԿՄ տարածքային թանգարանում շրջայց կատարելուց հետո գեներալ-լեյտենանտ Մանվել Գրիգորյանը, ողջունելով տարածքային կառույցի կատարած աշխատանքն ու մեծ կարեւորություն տալով դրան,  Orer.am-ի հետ զրույցում ասաց. «Առանց մեր պատմության ներկան և ապագան չենք կարող համեմատել և տանել, միայն 6000 հազարից ավել զոհված տղաներ ունի Երկրապահը: Ապրիլյան պատերազմի ժամանակ էլ 14 զոհ է եղել ԵԿՄ-ից, որից մեկն էլ եղել է հենց այս բաժանմունքի կամավորական: Զոհվածների ծնողները, հարազատները պետք է իմանան, որ իրենց տղաները անմահացած են իրենց ընկերների, ժողովրդի համար»,-ասաց նա՝ շեշտելով, որ ինքն ամեն օր հիշում է մարտի դաշտում ընկած ընկերներին:

«Օր չկա, որ չհիշեմ տղաներին կամ մտքեր չկիսեմ նրանց հետ: Շատ ժամանակ, որ որևէ մեկի վրա ջղյանանում եմ կամ հոգնում եմ, երբ հիշում եմ՝ ովքեր են մեզ հնարավորություն տվել էս երկրում ապրենք, ընտանիք կազմենք, նորից խելոքանում եմ, նստում եմ տեղս, ես իմ կյանքում ինձանից մի քանի անգամ հզոր տղաների եմ հանդիպել ու իրենք ուղեցույց են եղել: Կամավորներն են ստեղծել էս երկիրը, էս պետությունը»,-ասաց ԵԿՄ նախագահը:

Սոսե Չանդոյան