«Ինչքան կերպարս բարդ է, ես այնքան հաճույքով ու հետաքրքրությամբ եմ խաղում». Մերի Հակոբյան

Exclusive

Past.am-ի զրուցակիցը սիրված դերասանուհի, ռեժիսոր Մերի Հակոբյանն է:

 

- Հեռուստադիտողը Ձեզ ավելի շատ սիրեց ու ճանաչեց «Հարազատ թշնամի» հեռուստասերիալից: Հետաքրքիր է՝ մինչ այդ ինչո՞վ էիք զբաղվում:

- Մինչ այդ նկարահանվում էի Աբել Աբելյանի պրոյեկտում և «Կյանքից առավել» հեռուստասերիալում: Այնուհետև «Հարազատ թշնամի» հեռուստասերիալից առաջարկ ստացա, տեղափոխվեցի «Արմենիա TV» և սկսեցի համագործակցությունս Դիանա Գրիգորյանի հետ:

- Տեղյակ եմ, որ մասնագիտությամբ նաև ռեժիսոր եք: Երբևէ Ձեզ այդ ոլորտում փորձե՞լ եք:

- Այո, անպայման: Մինչև ֆիլմերում նկարահանվելն աշխատում էի հեռուստատեսությունում՝ որպես ռեժիսորի օգնական: Ինձ շատ էին ասում, որ իմ տեղը հենց հեռուստատեսությունն է, և պետք է ոչ թե տեսախցիկից դուրս, այլ դրա դիմաց աշխատեմ: Սկսեցի մտածել այդ ուղղությամբ, բայց, տեսնում էի, թե ինչ բացասաբար են վերաբերվում այն մարդկանց, ովքեր կրթություն չունեն և լիարժեք չեն տիրապետում դերասանի մասնագիտությանը: Անընդհատ ներգրավված լինելով նկարահանման պրոցեսում, ես քիչ թե շատ տեղեկություններ ունեի մասնագիտության մասին, բայց հասկանում էի, որ այդ ամենը շատ քիչ է:

 

Եվ, քանի որ ես էլ պետք է լինեի նոր սերնդի դերասանուհի, ավելի խորը սկսեցի ուսումնասիրել դերասանի մասնագիտությունը, որպեսզի ես էլ չարժանանամ քննադատողների բացասական վերաբերմունքին: Սկսեցի Արտաշես Ալեքսանյանի մետ անհատական դերասանական դասերի հաճախել, որից հետո միայն ընդունեցի նկարահանվելու առաջարկը, որպեսզի հեռուստադիտողն ինձ ավելի լուրջ ընդունի՝ որպես դերասանուհի:

- Երբ ֆիլմերին, որոնցում խաղում եք, նայում եք ոչ թե դերասանի, այլ ռեժիսորի աչքերով, առաջին բանը, որ կփոխեիք դրանցում, ո՞րն է:

- Ես կարծում եմ, որ ֆիլմում առաջնայինը սցենարն է: Եթե սցենարը շատ ուժեղ լինի, կարծում եմ՝ պրոդյուսերներն ու ռեժիսորները կանեն իրենցից կախված ամեն ինչ՝ լավ ֆիլմ նկարահանելու համար: Ճիշտ է, կինեմատոգրաֆիան հիմա Հայաստանում զարգանում է, բայց, փաստացի, սցենարային առումով դեռ շատ ենք կաղում: Շատ կուզենայի, որ սցենարային մտահղացումները ավելի ամուր, հզոր հիմքերի վրա լինեին, քանի որ մենք ունենք այդ հնարավորությունը, այնպես չէ, որ մեզնից ոչինչ չենք ներկայացնում: 

- Կա՞ հայկական կինեմատոգրաֆիայում ինչ-որ դերասան, ում հետ կցանկանայիք խաղալ կամ ռեժիսոր, ում հետ կցանկանայիք աշխատել:

- Ելենա Արշակյանի հետ էի շատ ցանկանում աշխատել, հիմա այդ փուլում եմ: Կուզենայի աշխատել նաև Հրաչ Քեշիշյանի հետ: Վերջին շրջանում նկարահանված հայկական ֆիլմերից հետաքրքիր կլիներ «Կյանք ու կռիվ» ֆիլմում խաղալ, քանի որ բազմաթիվ կոմերցիոն պրոյեկտներից հետո այն ունեցավ բավականին լուրջ ու դրական արձագանքներ:

- Ինչպես գիտենք, Դուք երկվորյակ քույր ունեք, ով բավականին նման է Ձեզ: Հետաքրքիր է՝ Ձեզ հաճա՞խ են շփոթում, ինչ-որ զվարճալի դեպք կարո՞ղ եք հիշել:

- Այո, հաճախ են շփոթում, զվարճալի դեպքերն էլ շատ-շատ են:Օրինակ՝ միջոցառումների, երեկույթների ժամանակ շատ հաճախ մոտենում են նրան, ցանկանում նկարվել՝ կարծելով, թե դա ես եմ: Իհարկե, քույրս զգուշացնում է, որ շփոթել են, բայց, մեկ է, այդ մարդիկ ուզում են Մերի Հակոբյանի հետ լուսանկարվել, ու քույրս տարօրինակ դեմքով համաձայնում է:

- Հարցազրույցներում բազմիցս նշել եք, որ չեք սիրում բարձրաձայնել Ձեր անձնական կյանքը, բայց, այնուամենայնիվ, այս փուլում անձնական կյանքը Ձեզ մոտ լրիվ անտեսվա՞ծ է, կարիերա՞ն է առաջնայինը:

- Փորձում եմ համատեղել, բայց, եթե տոկոսային հարաբերությամբ վերցնենք, բնականաբար, աշխատանքն է գերակշռում:

- Մի փոքր էլ «Քավարան»-ից խոսենք: Ինչպե՞ս էիք ստացել առաջարկը, ստեղծագործական թիմը հավանու՞մ էիք:

- «Քավարանի» նման պրոյեկտ Հայաստանում դեռ չէր եղել: Քանի որ այն ավելի շատ սարսափ ժանրի էր, դրա համար հետաքրքրեց: Առաջարկը եղավ Հարութ Շատյանի կողմից: Դերը հետաքրքիր էր, մտածեցի, որ կկարողանամ այդ կերպարում ինձ գտնել, ու բավականին հետաքրքիր եմ համարում պրոյեկտը: 

Միանշանակ հիասքանչ թիմ էր հավաքվել, բոլորը պրոֆեսիոնալ դերասանների էին: Շատ ժամանակ՝ ցուրտ ամիսներին, մենք շատ բարդ տեսարաններ ենք ունեցել դրսում, բայց հենց այդ պրոֆեսիոնալիզմի շնորհիվ կարողացել ենք հաղթահարել այդ ամենը ու կարծում եմ՝ արժեր:

- Հարցազրույցներից մեկում նշել եք, որ թրաֆիքինգի մասին պատմող նոր ֆիլմում դրական կերպարով եք հանդես գալու: Քանի որ արդեն երկու տիպի դերերում էլ խաղալու փորձ ունեք, փորձեք համեմատել:

- Ոչ մի կերպար հեշտ չեմ կերտում, ամբողջովին ուսումնասիրում եմ, փնտրում, գտնում, խորհրդակցում եմ թե՛ իմ վարպետի՝ Արտաշես Ալեքսանյանի, թե՛ ռեժիսորի հետ, քննարկում ենք. մի խոսքով՝ երկար, աշխատատար պրոցես է: Տարբերություն չեմ դնում՝ դրական, թե բացասական: Այս դրականը բացասականից տասն անգամ բարդ է ինձ համար, որովհետև հոգեբանորեն ծանր կերպար է: Բացասականն էլ պակաս բարդ չէ, ուղղակի սա մի քիչ ավելի խորը հոգեբանական է:

Եթե համեմատեմ իմ խաղացած մյուս կերպարների հետ, միանշանակ սա մի քանի անգամ ավելի բարդ է, և ինչքան կերպարս բարդ է, ես այնքան հաճույքով ու հետաքրքրությամբ եմ խաղում, որովհետև այդ դեպքում միայն կարող ես դերասանական ավելի մեծ հնարավորություններ ցույց տալ հեռուստադիտողին:

- Եվ, վերջում, բացի վերը նշված ֆիլմից, ուրիշ ի՞նչ նորություններ սպասենք Ձեզնից:

- Նոր պրոյեկտը կլինի արդեն հունիսի 26-ին՝ «Armenia Premium»-ի եթերում: Դրանից հետո հնարավոր է՝ նկարահանվեմ սիթքոմում: Դրանից զատ՝ հուլիսին գեղարվեստական ֆիլմից առաջարկ ունեմ, բայց այն դեռ ընթացքի մեջ է, չեմ կարող հստակ որևէ բան ասել: Առաջարկներ կան, ամառն ինձ համար ոչ թե հանգստանալու, այլ աշխատելու ժամանակ է: ))

 

Մարիամ Նալբանդյան