Անկեղծ դաշնակցությունը

«Հայ Յեղափոխական Դաշնակցության» և Հայաստանի Հանրապետական կուսակցության միջև կոալիցիա ձևավորելու վերաբերյալ բանակցությունները գրեթե ավարտված են:

«Ազատության» հետ զրույցում այս մասին ասել է «Հայ Յեղափոխական Դաշնակցություն» խմբակցության ղեկավար Արմեն Ռուստամյանը:

«Նոր ԱԺ կանոնակարգը նախատեսում է, որ բաժանվեն կառավարող ու ընդդիմադիր խմբակցությունները: Պահանջ կա, որ պետք է այս հստակությունն անպայման մտնի, ինչը ենթադրում է նաև հուշագիր ստորագրել, քաղաքական կոալիցիա ստորագրելու մասին հուշագիր, որի վրա էլ մենք աշխատում ենք»,- ասել է Արմեն Ռուստամյանը:

Հարցին, թե ե՞րբ վերջնականապես կավարտվեն բանակցությունները, ՀՅԴ-ականը պատասխանել է, թե չի բացառվում, որ դրանք այս շաբաթ էլ ավարտվեն:

Իհարկե, Արմեն Ռուստամյանը շատ անկեղծ է։ Ինչպես նաև անկեղծ են այն մյուս դաշնակցականները, որոնք այլևս չեն խոսում հանրապետականի հետ համատեղ երկիր փրկող զգայացունց ծրագրերի մասին։ Չեն խոսում, որովհետև գիտեն, որ այլևս հավատացող չկա։ Մեր մեջ ասած, նախկինում էլ չէին հավատում, բայց թե մի բան պետք է խաբեի՞ն, գոնե շարքային կուսակիցների համար։ Իսկ վերջիններիս համար միևնույնն է, վերևներում կկոալիցվեն, թե չեն կոալիցվի։ Կա այն, ինչ կա։ Մարդիկ պարզ ասում են, թե տվեք մեզ մեր երկու-երեք պորտֆեյլը, եթե հարմար կգտնեք, տվեք նաև մեկ-երկու մարզպետի պաշտոն ու մեզ բավական է։ Քչով բավարարվում ենք, միևնույնն է, մեզ համար, պատմական Հայաստանը սկսվում է «Մեղեդի» սրճարանից ու ավարտվում է չորրորդ մասիվի գիշերային ակումբով։ Սա ավելի անկեղծ է, հասկանալի ու անմիջական։ Հակառակ դեպքում, մարդկանց խաբում էին, թե երկիր ենք շենացնելու Էրգրի հողերը հետ ենք բերելու, Ստամբուլն արյան ծով ենք սարքելու և այլն։ Ընկերներ, ինչպես գիտեմ միմյանց սիրում եք նման կերպ դիմել, վաղուց, Ձեր կուսակցության նշանավոր դեմքերից մեկն ասել է, որ Դաշնակցությունն այլևս անելիք չունի։

Ատոմ Ոսկանյան, Armenia24.info