«Ադրբեջանական խնձորի դեպքից» հետո Բագրատաշենի մաքսակետում քաոսային իրավիճակ է. «Փաստ»

«Փաստ» օրաթերթը գրում է.

«Փաստ» օրաթերթն օրերս ահազանգ էր ստացել այն մասին, որ ադրբեջանական խնձորի պատմությունից հետո ներկայում հայ–վրացական՝ Բագրատաշենի սահմանային անցակետերում քաոսային իրավիճակ է տիրում: Խնդիրն այն է, որ խստացված ստուգում իրականացնելու պայմաններում ֆիզիկական անձինք ևս չեն կարողանում իրենց հետ օրենքով սքահմանված 50 կգ քաշ ունեցող գյուղմթերք անցկացնել:

Խմբագրությանն ահազանգած քաղաքացիները նշում էին, որ շատերը նույնիսկ իրենց ապրանքը թափում են սահմանին և հեռանում, իսկ սահմանային գյուղերի բնակիչները, ովքեր գյուղմթերքը հիմնականում գնում են Սադախլոի շուկայից, անելանելի իրավիճակում են հայտնվել: Մեր տեղեկություններով, ստեղծված իրավիճակից դուրս գալու և իրենց բողոքի ձայնը իշխանություններին լսելի դարձնելու համար սահմանամերձ գյուղերի բնակիչները պատրաստվում են բողոքի ակցիաներ կազմակերպել և փակել միջպետական ճանապարհը:

Հայ–վրացական սահմանին արհեստականորեն ստեղծված լարվածության պատճառները պարզելու համար «Փաստ»–ը դիմեց ՊԵԿ լրատվական ծառայությանը, որը կներկայացնենք առաջիկայում:

Սակայն հաշվի առնելով այն, որ մաքսայինից բացի սահմանին բուսասանիտարական ծառայությունը նույնպես խստացված ռեժիմով ստուգում է իրականացնում փորձեցինք պարզել, թե արդյո՞ք «խիստ ստուգում» անվան տակ ձեռքի հետ էլ ծառայությունը չի սկսել ստուգել նաև ֆիզիկական անձանց կողմից ներկրվող գյուղմթերքը:

ՍԱՊԾ պետի մամուլի քարտուղար Նվարդ Առաքելյանը «Փաստին» տեղեկացրեց, որ ֆիզիկական անձանց կողմից մինչև 50 կգ պտուղ բանջարեղեն ներմուծելու ժամանակ բեռը ենթակա չէ փաստաթղթավորման, ուստի նման բեռների ստուգումն իրենց դաշտում չէ:

«50 կգ–ից ավելի գյուղմթերք ներկրելու ժամանակ արդեն հարկավոր է մասնագետի թույլտվությունը: Մեր խնդիրն է սահմանին խստորեն պահպանել օրենքը և ռիսկեր պարունակող բեռները մանրակրկիտ զննության ենթարկել: Խոսքը վերաբերում է հատկապես Թուրքիայից և Պակիստանից ներկրվող գյուղմթերքին: Նշված երկրները ճանաչված են որպես ռիսկային և մենք նաև հրաման ունենք, որ այնտեղից ներմուծվող սննդամթերքները շատ ավելի խիստ ռեժիմով պետք է ստուգվեն»,– ասաց Ն. Առաքելյանը:

Նա նաև տեղեկացրեց, որ կառույցի կողմից իրականացված ստուգումների արդյունքներով ներկրված ապրանքը հիմնականում համապատասխանում է պահանջվող նորմերին:

Պատասխանելով հարցին, թե բացառո՞ւմ են արդոք, որ թուրքական ապրանքը երրորդ երկրի միջոցով ներկրվի Հայաստան և նման խիստ ռեժիմով ստուգման չենթարկվի, ՍԱՊԾ պետի մամուլի խոսնակն ասաց, որ իրենց կողմից ստուգումն իրականացվում է հաշվի առնելով ծագման երկիրը:

Ի դեպ, Ազգային վիճակագրական ծառայության տվյալներով 2015–ին Պակիստանից ներկրվել է 4314800 դոլարի, իսկ արտահանվել 50100 դոլարի ապրանք, 2016–ին 3 մլն 700 հազար դոլարի, արտահանվել մոտ 19 հազար դոլարի ապրանք, իսկ այս տարվա տվյալներով՝ Պակիստանից Հայաստան ներկրվել է մոտ 950 հազար դոլարի ապրանք, իսկ Հայաստանից Պակիստան արտահանում չի իրականացվել:

2015–ին Թուրքիայից Հայաստան է ներկրվել մոտ 137 մլն դոլարի, իսկ Հայաստանից Թուրքիա է արտահանվել մոտ 1,5 մլն դոլարի ապրանք, 2016–ին հարևան երկրից Հայաստան է ներկրվել մոտ 164 մլն դոլարի, իսկ մեր երկրից արտահանվել 504 հազար դոլարի ապրանք, իսկ 2017–ին արդեն իսկ ներկրվել է 45 մլն դոլարի, իսկ արտահանվել մոտ 260 հազար դոլարի ապրանք:

 Շարունակությունը` «Փաստ» օրաթերթի այսօրվա համարում