Կառավարությունը կսուբսիդավորի հավելյալ արժեք ստեղծող ընկերությունների վարկային տոկոսները

Կառավարության նիստում ՀՀ վարչապետ Կարեն Կարապետյանը տնտեսության գերակա ոլորտներում պետության կողմից աջակցության վերաբերյալ հանձնարարական տվեց: «Բազմիցս բարձրաձայնել ենք տնտեսական գերակա ոլորտներում պետության կողմից նպատակային և արդյունավետ աջակցություն տրամադրելու ցանկության մասին: Կարծում եմ` ժամանակն է, որ կառավարությունը գերակա ոլորտներում աշխատող և նոր ստեղծվող ձեռնարկություններին ցուցաբերի աջակցություն, մասնավորապես առաջարկում ենք այդ ոլորտներում մեկնարկել պետության կողմից ձեռնարկություններին բանկերից տրամադրվող կոմերցիոն վարկերի որոշակի տոկոսների սուբսիդավորման նոր քաղաքականություն»,- «Արմենպրես»-ի հաղորդմամբ, ասաց վարչապետը: 

Նրա խոսքով, դա կնպաստի տնտեսության արդյունավետության ու մրցունակության բարձրացմանը, հավելյալ արժեք ստեղծողներին աջակցելուն և, ամենակարևորը, նոր ու կայուն աշխատատեղերի ստեղծմանը:

Կարեն Կարապետյանը հանձնարարեց Տնտեսական զարգացման և ներդրումների, Ֆինանսների, Գյուղատնտեսության  նախարարներին երկշաբաթյա  ժամկետում Կենտրոնական բանկի և կոմերցիոն բանկերի հետ համատեղ քննարկել բանկային տոկոսների սուբսիդավորման հստակ առաջարկություններ՝ ըստ գերակա ոլորտների:

«Կարծում եմ, կարևոր գործընթաց ենք սկսում: Մենք նման քննարկումներ իրականացրել ենք գյուղատնտեսության նախարարությունում կաթիլային ոռոգման, գյուղտեխնիկայի լիզինգային սպասարկման վերաբերյալ: Թեթև արդյունաբերության ոլորտում եթե վարկ են վերցնում, մենք տրամադրված ենք երկու տարով սուբսիդավորել բանկային տոկոսները»,- ասաց Կարեն Կարապետյանը: