Մեր նպատակը առավելագույն ցածր գնով որակյալ ապրանք և ծառայություն ձեռք բերելն է. Վարդան Արամյան

Կառավարությունը հաստատեց գնումների գործընթացի կազմակերպման կարգը և ուժը կորցրած ճանաչեց նախկինում ընդունած որոշումներից մեկը: Ըստ այդմ՝ գնումների գործընթացի կազմակերպման կարգը կհամապատասխանեցվի «Գնումների մասին» օրենքի պահանջներին: Այսպիսով, կկարգավորվեն, մասնավորապես, ՀՀ տարածքից դուրս գնումների կատարման, գնումների պլանավորման, գնման առարկայի բնութագրերի հաստատման, գնումների նախնական հսկողությա, պայմանագրերի կատարման, կառավարման և ֆինանսավորման հետ կապված հարաբերությունները: Կսահմանվեն նաև «փոխկապակցված անձինք» հասկացությունը և այդ անձանց կողմից գնման ընթացակարգերին մասնակցության սահմանափակման դեպքերը, հրավերի և պայմանագրի հիմնական պայմանները, կենտրոնացված կարգով գնում կատարելու կարգը և կենտրոնացված եղանակով գնում կատարող լիազոր մարմինը կամ իրավաբանական անձը:

ՀՀ ֆինանսների նախարար Վարդան Արամյանը նշեց, որ օրենքով նախատեսվել են մի շարք փոփոխություններ գնումների գործընթացում, պարզեցվել են ընթացակարգերը: Ըստ նախարարի, մասնավորապես, փոփոխությունների է ենթարկվել երաշխիքի ինստիտուտը. պետության կարիքների համար գնումներում ներդրվել են ռիսկերի կանխարգելիչ մեխանիզմներ՝ տնտեսավարողների համար խնդիրներ չստեղծելով: «Նախ տարանջատել ենք 70 մլն դրամ և դրանից բարձր գնումները: 70 մլն դրամից բարձր գնումներում մենք դրել ենք պարտադիր բանկային երաշխիքի պահանջը»,- «Արմենպրես»-ի փոխանցմամբ,  նշեց նախարարը:

Վարդան Արամյանն ընդգծեց, որ կարգի նպատակը գնումների գործընթացում թափանցիկության, պատասխանատվության բարձրացումն է:

Անդրադառնալով հարցին՝ ՀՀ վարչապետ Կարեն Կարապետյանը հորդորեց լինել ուշադիր և չդնել այնպիսի պայման, որը կբերի ծառայության գնի թանկացման: Վարչապետը նշեց, որ ՀՀ պաշտպանության և ՀՀ գյուղատնտեսության նախարարի հետ քննարկել են ՊՆ պահանջների համար գնումների հատուկ կարգ հաստատելու հարցը, որպեսզի մեր ֆերմերները կարողանան ուղղակիորեն մասնակցել այդ գործընթացին: 

«Մեր հիմնական նպատակն առավելագույն ցածր գնով առավելագույն որակյալ ապրանք և ծառայություն ձեռք բերելն է»,- ի պատասխան նշել է Վարդան Արամյանը: