Մասնագետներն առաջիկայում կստեղծեն Հայաստան-Վրաստան քայլարշավային առաջին արահետը

 Հայաստանում կան բազմաթիվ զբոսաշրջիկների համար անհայտ գեղեցիկ վայրեր: «Արմենպրես»-ի հաղորդմամբ` մայիսի 4-ին լրագրողների հետ հանդիպման ժամանակ նման կարծիք հայտնեց Հայկական աշխարհագրական նախագծի ղեկավար Տիգրան Շահբազյանը:

«Մեր կազմակերպությունը զբաղվում է աշխարհագրական տուրիզմով, գովազդում ենք անհայտ Հայաստանի վայրերը, որպեսզի զբոսաշրջիկների հոսքը դեպի այդ վայրերն ավելանա: Բարձրանում ենք այնպիսի լեռներ, որոնց մասին տեղեկությունը շատ քիչ է կամ չկա»,- նշեց Շահբազյանը:

Նա նշեց, որ իրենց կազմակերպությունը փորձում է տեղեկություն հավաքել այդ վայրերի մասին, իսկ այդ տեղեկատվությունը հետագայում տարածում են համացանցով:

«Առաջիկա օրերին նախատեսում ենք բարձրանալ Թուխմանուկ լեռը: Մոտ 30 այդպիսի վայրեր արդեն իսկ բացահայտել ենք, որոնցից մի քանիսում զբոսաշրջիկները սկսել են  հաճախակի այցելել: Դրանցից մեկը Դժոխքի ձորն է»,- նշեց Շահբազյանը:

«Տրանսկովկասյան արահետ» զբոսաշրջության աջակցման հասարակական կազմակերպության նախագահ Վահագն Վարդումյանն էլ հայտնեց, որ առաջիկայում նախատեսվում է Հայաստան-Վրաստան քայլարշավային արահետ ուղենշել:

«Դա լինելու է գողտրիկ արահետ, բնության հետ համահունչ: Բարեկարգվելու են վտանգավոր ուղիները, տեղ-տեղ հնարավոր է փոքրիկ կամուրջներ կառուցվեն»,- ասաց Վարդանյանը:

Արկածային զբոսաշրջության մասնագետ, լեռնային ուղեկցորդ Գոռ Հովհաննիսյանի խոսքով` արկածային զբոսաշրջությունը Հայաստանում մեծ հեռանկար ունի:

«Երկար տարիներ ուսումնասիրել եմ արկածային տուրիզմի կազմակերպումը մեր նման պոտենցիալ ունեցող  այլ երկրներում: Կարծում եմ` Հայաստանն ունի բոլոր հնարավորությունները արկածային զբոսաշրջությունը զարգացնելու համար: Բացի այդ, Հայաստանը մի քանի տարի առաջ աշխարհում զբաղեցրել է 3-րդ տեղը էքստրեմալ տուրիզմի ներուժ ունեցող երկրների շարքում»,- եզրափակեց Հովհաննիսյանը: