Նախագահ Սերժ Սարգսյանը շնորհավորել է ՌԴ Նախագահ Վլադիմիր Պուտինին՝ ծննդյան օրվա առթիվ

Նախագահ Սերժ Սարգսյանն այսօր հեռախոսազրույց է ունեցել Ռուսաստանի Դաշնության Նախագահ Վլադիմիր Պուտինի հետ, շնորհավորել և բարեմաղթանքներ հղել նրան ծննդյան օրվա առթիվ:

ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից հայտնում են, որ ՌԴ Նախագահին ՀՀ Նախագահը նաև շնորհավորական ուղերձ է հղել:

«Հարգարժա՛ն Վլադիմիր Վլադիմիրի,
Ընդունեք ամենաջերմ և սրտանց շնորհավորանքներս Ձեր ծննդյան օրվա առթիվ:

Ձեր երկարամյա պետական գործունեությամբ, հարուստ քաղաքական փորձով և ի շահ Ռուսաստանի բարգավաճման ու նրա քաղաքացիների բարեկեցության նախանշված նպատակներին հասնելու հետևողականությամբ Դուք արժանացել եք Ձեր հայրենակիցների խորը հարգանքին և համաշխարհային ասպարեզում բարձր հեղինակության:

Հայաստանում բարձր են գնահատում Ձեր անձնական ներդրումը Հայաստանի և Ռուսաստանի դաշնակցային փոխգործակցության զարգացման գործում՝ հիմնված մեր երկրների ժողովուրդների բարեկամության, եղբայրության և փոխադարձ աջակցության վրա: Վստահ եմ, որ մեր համատեղ ջանքերը այսուհետ ևս ուղղված կլինեն միջպետական քաղաքական երկխոսության հետագա ընդլայնմանը, հայ-ռուսական համագործակցությունը ռազմավարական նախաձեռնություններով և առևտրատնտեսական, հումանիտար ու այլ ոլորտներում հեռանկարային նախագծերով հետևողականորեն լրացնելուն, ինչը բխում է մեր ժողովուրդների արմատական շահերից:

Վստահ եմ, որ հայ-ռուսական ռազմավարական գործընկերության ամրապնդումը ինտեգրացիոն գործընթացների շրջանակներում և բազմակողմ կառույցների ձևաչափով կնպաստի տարածաշրջանային կայունության և անվտանգության ապահովմանն ուղղված համատեղ նպատակներին:

Հարգելի՛ Վլադիմիր Վլադիմիրի, սրտանց մաղթում եմ Ձեզ քաջառողջություն, երջանկություն, բարեկեցություն, նորանոր հաջողություններ բոլոր նախաձեռնություններում»,-ասված է ՀՀ Նախագահի շնորհավորական ուղերձում: