Մեծ աղմուկ ոչնչից

«Ֆեյսբուք» սոցցանցում օգտատեր Գոհար Աբաջյանը հրապարակել էմի լուսանկար, որտեղ պատկերված են Արարբկիր վարչական շրջանում՝ Վահագն Դավթյանի այգու հարևանությամբ, գտնվող մայթեզրի հատված ծառեր: Այս կապակցությամբ հաղորդագրություն է տարածել Երևանի քաղաքապետարանը՝ պարզաբանելով, որ ծառերի հատումն իրականցվել է համապատասխան որոշման արդյունքում, քանի որ հատված ծառերը եղել են վթարային, դրանց բունը եղել է ամբողջովին փտած, և ըստ էության, ծառերը վտանգ են ներկայացրել շրջակա միջավայրի և քաղաքացիների համար:

Քաղաքապետարանի տարածած հաղորդագրության մեջ նշվում է նաև, որ Վահագն Դավթյանի անվան այգին մշտապես քաղաքապետարանի ուշադրության և հոգածության կենտրոնում է: 
Հատված ծառերի այս լուսանկարների շուրջ բարձրացած աղմուկը արդեն իսկ վկայում է այն տրամադրության մասին, որը կա ավագանու ընտրություններին մասնակցող «Ելք» դաշինքում: Բանն այն է, որ Գոհար Աբաջյանը «Ելք» դաշինքով պատգամավոր դարձած Արարատ Միրզոյանի կինն է:

Այսինքն, ըստ էության, պետք է փաստել, որ նման լուսանկարներ հրապարակելով՝ փորձ է արվում ուղղակիորեն հատված ծառերը դարձնել քննադատության թիրախ, այն դեպքում, երբ շատ սովորական մի զանգով, եթե այդքան մեծ է մտահոգությունը հատած ծառերի կապակցությամբ, կարելի էր պարզել, թե ինչու և ինչ հիմքերով են հատվել այդ ծառերը: Հետաքրքիրն այն է, որ անգամ այդ լուսանկարներում երևում է, որ ծառերի բները փտած են: Պատկերացնո՞ւմ եք մի իրավիճակ, եթե, ասենք, նույն քաղաքապետարանի որոշմամբ ծառերը չհատվեին, և օրերից մի օր ուժեղ քամուց տապալվեին և վնասեին որևէ քաղաքացու կամ նրա գույքը:

Ամենայն հավանականությամբ, այդ ժամանակ էլ պետք է բողոքի կոչեր հնչեին, թե ինչու քաղաքապետարանը չի հատում փտած ծառերը: Այսինքն սա ցույց է տալիս այն, որ իրականում խնդիրը ոչ թե քաղաքի կանաչապատման հարցում մեր ընդդիմադիրների ծայրահեղ մտահոգվածությունն է, այլ զուտ քարոզչության նպատակը: Սակայն այստեղ թերևս պետք է ասել, որ նման միջոցներով քարոզչությունը ընդամենը վկայում է ակնհայտ պարտվողական տրամադրությունների և փրփուրներից կախվելու մասին, իսկ քաղաքի մասին հոգ տանողները լուռ ու մունջ իրենց աշխատանքը կատարում են: 

Նույն այս ժանրից էր նաև Ելքի մեկ այլ համակիր Գրիգորի Դոխոյանի ֆեյսբուքյան գրառումը, որտեղ նա պնդում էր, թե իր որդիների դրպոցի և մանկապարտեզի տնօրենները ստիպում են երեխաների ծնողներին՝ ներկա լինել Տարոն Մարգարյանի հետ հանդիպումներին: Այս գրառումը բնականաբար հերքվել էր դպրոցի տնօրենի կողմից: 

Տնօրենը շեշտել էր, որ դա ընդամենը հերյուրանք է, պետք է նշել, որ նման պարտադրանքների մասին որևէ փաստ այդպես էլ չի ներկայացվել: Սա նշանակում է միայն այն, որ որոշ անհատներ մանր քաղաքական դիվիդենտների համար պատրաստ են անգամ այսօրինակ լուրեր և գրառումներ տարածելուն, իսկ եթե վերջիններս իսկապես էլ ունեն այդպիսի փաստեր, ապա կարող են դիմել համապատասխան մարմիններին և ոչ թե անհասցե հայտարարություններ կատարեն: 

Ժիրայր Գաբրիելյան