Մեկնարկում է Էդվարդ Միրզոյանի անվան պատանի կոմպոզիտորների հանրապետական մրցույթը

 ՀՀ մշակույթի նախարարության աջակցությամբ՝  մայիսի 10-ին կմեկնարկի Էդվարդ Միրզոյանի անվան պատանի կոմպոզիտորների հանրապետական 4-րդ մրցույթը: Այս մասին «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից:

Մրցույթի կազմակերպիչն է Հայաստանի կոմպոզիտորների միությունը, աջակիցը՝  Երևանի քաղաքապետարանը:
Էդվարդ Միրզոյանի անվան պատանի կոմպոզիտորների հանրապետական մրցույթն անցկացվում է 2014 թվականից, որի նպատակն է հնարավորություն ընձեռել պատանի կոմպոզիտորներին դրսևորվելու, ներկայացնելու իրենց ստեղծագործություններն ու կոմպոզիտորական մեծ ընտանիքի մասնիկը դառնալու:

Մրցույթին մասնակցության հայտ է ներկայացրել Հայաստանի, Արցախի երաժշտական և արվեստի դպրոցների, միջին մասնագիտական ուսումնական հաստատութունների ավելի քան երկու տասնյակ պատանի ստեղծագոծող:
Մրցույթն անցկացվում է երկու փուլով՝  ընտրական (փակ) և մրցութային 2 տարիքային խմբրերում. կրտսեր խումբ` մինչև 13 տարեկան ներառյալ, ավագ խումբ` 14-18 տարեկան:

Երկու խմբերի մրցութային փուլերը կկայանան մայիսի 10-ին, ժամը 16:00-ին, մրցանակաբաշխությունն ու Գալա համերգը՝ մայիսի 12-ին, ժամը 16:00-ին, Հայաստանի կոմպոզիտորների միության դահլիճում:

Մրցույթի երկու խմբերում մրցանակային տեղեր զբաղեցրած մասնակիցները կպարգևատրվեն խրախուսական նվերներով, պատվոգրերով, իսկ հաղթողները՝ նաև դրամական պարգևներով: Երկու ենթախմբերի հաղթող մասնակիցների ուսուցիչները ևս կարժանանան դրամական պարգևների:

Մրցույթի ժյուրիի անդամներն են` ՀՀ արվեստի վաստակավոր գործիչ, կոմպոզիտոր, ՀԿՄ նախագահ Արամ Սաթյանը, ՀՀ ժողովրդական արտիստ, կոմպոզիտոր Տիգրան Մանսուրյանը, ՀՀ ժողովրդական արտիստ, կոմպոզիտոր Մարտին Վարդազարյանը, ՀՀ ժողովրդական արտիստ, կոմպոզիտոր Երվանդ Երզնկյանը, ՀՀ արվեստի վաստակավոր գործիչ, կոմպոզիտոր Լևոն Չաուշյանը, ՀՀ արվեստի վաստակավոր գործիչ, կոմպոզիտոր Ստեփան Շաքարյանը, մրցույթի գեղարվեստական ղեկավար, կոմպոզիտոր Էդմոնդ Մակարյանը: