Զբոսաշրջիկները Հայաստան են այցելում բնության, մշակութային կառույցների, եկեղեցու ու խոհանացի համար

Հայաստանում զբոսաշրջության զարգացման համար պետք է «ազատվել» զբոսաշրջության խորհրդային մոդելից: Խորհրդային տարիներին զբոսաշրջությունը չէր խրախուսում զբոսաշրջիկի կապը բնակչության հետ: Այդ է պատճառը, որ հիմնական զբոսավայրերը բնակավայրերից հեռու են: Բնակիչն այս դեպքում չէր կարող հուշանվեր վաճառել զբոսաշրջիկին կամ ծառայություն մատուցել և դրա համար վճարվել: Փոխարենն՝ այսօր ոլորտի զարգացման տեսլականը պետք է հիմնվի զբոսաշրջիկ-բնակիչ անմիջական կապի վրա: Այս մասին «Արմենպրես»-ի հետ զրույցում նշեց Հայաստանի զարգացման հիմնադրամի զբոսաշրջության գծով տնօրեն Տիգրան Կարապետյանը:

«Մեր կառուցվածքային զարգացման ուղղությունը հակառակն է: Մենք պետք է փորձենք նոր ծրագրեր իրականացնելիս այնպես անել, որ ճանապարհը տանի նաև այն մշակութային հուշարձանների մոտ, որտեղ կա բնակչություն ու, մյուս միջազգային ծրագրերի շնորհիվ, այդ բնակչությանը պետության կողմից մատուցել կրթության ծառայություն՝ գործիքներ, որ բնակիչը և՛ արժևորի զբոսաշրջիկին, և՛ իր աշխատանքը ու շահ ստանա, բայց ոչ թե կարճաժամկետ, այլ երկարաժամկետ՝ գրանցելով դինամիկ զարգացում այն ներուժի, որ մենք ունենք»,- նշեց Տիգրան Կարապետյանը:

Խոսելով այն երկրների մասին, որտեղից ամենաշատն են մեր երկիր զբոսաշրջիկներ գալիս, Տիգրան Կարապետյանը տեղեկացրեց, որ վերջին տարիներին այդ առումով առաջատար երկներն են՝ ՌԴ-ն, ԱՄՆ-ը և Ֆրանսիան: Միայն 2010 թվականին Իրանի Հանրապետությունից ավելի շատ զբոսաշրջիկ եկավ Հայաստան, և Ֆրանսիան դիրքը զիջեց: «Մենք ունենք մի քանի հաջողված ծրագրեր, մասնավորապես, Իտալիայի հետ, որտեղ 2011-2012 թվականներին՝ գրատպության 500-ամյակը նշելու ընթացքում կարողացանք նաև գովազդել Հայաստանը՝ որպես զբոսաշրջության կենտրոն, և կարողացանք հետաքրքրություն առաջացնել և Հայաստան բերել իտալացի զբոսաշրջիկներին. այդ ժամանակ Իտալիան 4-րդ հորիզոնականը գրավեց Հայաստան եկած զբոսաշրջիկների թվով: Սա բավական մեծ աշխատանք էր, եթե հաշվի առնենք այն, որ ՌԴ-ն, ԱՄՆ-ը և Ֆրանսիան բավական մեծ հայկական գաղթօջախներ ունեն, Իտալիան դարձավ ոչ սփյուռքահայ զբոսաշրջիկ «մատակարարող» երկիրը: Սա դարձավ կիրառելի փորձ նաև այլ երկրներում: Այն ծրագրերը, որ, օրինակ, իրականացնում է Մշակույթի նախարարությունը դրսում, շատ մեծ կարևորություն ունեն՝ ցուցահանդեսներ, համերգներ, բայց դրանց հետ պետք է լինի միավոր, որը գովազդում է Հայաստանը՝ որպես զբոսաշրջության կենտրոն: Հռոմի Պապի հայտարարության շնորհիվ ամբողջ կաթոլիկ աշխարհում հետաքրքրություն ստեղծվեց Հայաստանի շուրջ: Հիմա մեր աշխատանքը պետք է լինի այս մարդկանց Հայաստանը տեսնելու հնարավորություն տալը: Դա պետք լինի համակարգված աշխատանք: Բոլորս նպատակը մեկն է՝ ավելանա զբոսաշրջիկների քանակը, Հայաստան այցելած զբոսաշրջիկները գոհ վերադառնան»,- նշեց Տիգրան Կարապետյանը՝ ավելացնելով, որ զբոսաշրջիկների տարեկան թիվն անցնում է 1 մլն-ից, սակայն այս տարի ակնկալվում է նաև 10 տոկոս աճ՝ հաշվի առնելով Ցեղասպանության տարելիցին նվիրված միջոցառումներն ու այն հետաքրքրությունը, որ կա այդ միջոցառումների նկատմամբ:

Հայաստանն ավելի շատ գրավում է զբոսաշրջիկներին մշակութային կառույցներով ու բնությամբ: Թեև վերջին տարիներին երկրում զարգանում է նաև զբոսաշրջության այլ ձևեր ևս, սակայն, ինչպես ցույց են տալիս Միլանի զբոսաշրջության ցուցահանդեսի շրջանակներում արված վերջին հարցումները, Հայաստանը զբոսաշրջիկների մեծ մասի պատկերացմամբ՝ բնությունն է, մշակութային կառույցներն, կրոն ու սնունդը: Սրանք էլ կլինեն ոլորտի այս տարվա զարգացման հիմնական ուղղությունները:

Արմենուհի Մխոյան