Վարշավայում կայացել է Լեհաստանի հայերի երկրորդ համաժողովը

 Վարշավայի Գյուղատնտեսության ազգային գրադարանի մեծ դահլիճում մայիսի 8-ին տեղի է ունեցել Լեհաստանի հայերի երկրորդ համաժողովը, որը կազմակերպել էին Լեհաստանում ՀՀ դեսպանությունը և ՀՀ սփյուռքի նախարարությունը: Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, համաժողովին իր ուղերձն էր հղել Լեհաստանի Սեյմի նախագահ (մարշալեկ) Մարեկ Կուխչինսկին: Համաժողովի ներկա էր ԼՀ Սենատի անդամ Յան Մարիա Յակովսկին, ով համաժողովի մասնակիցների է փոխանցել ԼՀ Սենատի նախագահ Ստանիսլավ Կարչևսկու ողջույնները:

Համաժողովի բացման պաշտոնական արարողությանը ողջույնի խոսքով հանդես են եկել ՀՀ սփյուռքի նախարար Հրանուշ Հակոբյանը, Լեհաստանում ՀՀ դեսպան Էդգար Ղազարյանը և ԼՀ կառավարության Ազգային ու էթնիկ փոքրամասնությունների համատեղ հանձնաժողովում հայ փոքրամասնության ներկայացուցիչ Էդվարդ Միեր-Ենջեյովիչը:

Դեսպան Ղազարյանն իր խոսքում, մասնավորապես նշել է, որ Լեհաստանի հայ համայնքն առանձնահատուկ դեր ունի հայկական Սփյուռքում: «Դարեր շարունակ ապրելով Լեհաստանում` հայերը կարողացել մշտապես իրենց դրսևորել իբրև այդ երկրի արժանավոր քաղաքացիներ` մշտապես պահպանելով իրենց ազգային ինքնությունը: Նրանք կարողացել են հարստացնել և սերնդից սերունդ փոխանցել մեր դարավոր մշակույթն ու ավանդույթները` թողնելով արժեքավոր ժառանգություն` այն ծառայեցնելով նաև Լեհաստանի զարգացմանը և ամրապնդվելով մեր երկու ժողովուրդների փոխադարձ անկեղծ հարգանքն ու բարեկամությունը», - նշել է Էդգար Ղազարյանը։

ՀՀ դեսպանն նաև հույս է հայտնել, Լեհաստանի հայերի համաժողովը լավ հարթակ կհանդիսանա համայնքին հուզող հարցերը վեր հանելու, քննարկելու, համատեղ ուժերով դրանց լուծման ուղիները գտնելու, համայնքն ավելի կազմակերպված և միասնական դարձնելու համար:

Այնուհետև, համաժողովի ընթացքում տեղի են ունեցել թեմատիկ քննարկումներ: Բանախոսություններով հանդես են եկել Լեհահայոց մշակութային ժառանգության հիմնադրամի նախագահ Յան Աբգարովիչը, Հայ Կաթողիկե եկեղեցու Վարշավայի և կենտրոնական Լեհաստանի հոգևոր հովիվ, Յուզեֆ Նաումովիչը, Գլիվիցեի Յուզեֆ Թեոդորովիչի անվան հայ համայնքի ներկայացուցիչ Բոգդան Կասպրովիչը և Լեհ-հայկական հիմնադրամի նախագահ Արսեն Հովսեփյանը:

Համաժողովի ամփոփիչ քննարկման թեման հայապահպանության խնդիրներն էին, որը վարել է Լեհաստանում ՀՀ դեսպան Էդգար Ղազարյանը։

Համաժողովի շրջանակներում Վարշավայի Գյուղատնտեսության Ազգային գրադարանի ճեմասրահում կազմակերպվել էր Լեհաստանում բնակվող հայազգի գեղանկարիչ Գրիգոր Ասլանյանի նկարների ցուցահանդեսը, ինչպես նաև Իսպանիայում բնակվող հայազգի գործիչ Արարատ Ղուկասյանի «Փնտրտունքերի ճանապարհին» բանաստեղծությունների ժողովածուի լեհաստանյան շնորհանդեսը: