Եվս մեկ պարտություն Եվրոդատարանում

Մարդու իրավունքների եվրոպական դատարանի «Մանուչարյանն ընդդեմ Հայաստանի» գործով 2016 թ. նոյեմբերի 24–ի վճռի պահանջները կատարելու նպատակով 2017 թ. պետական բյուջեով նախատեսված կառավարության պահուստային ֆոնդի հաշվին արդարադատության նախարարությանը պիտի հատկացվի 2 հազար 400 եվրոյին համարժեք դրամ` վճռով սահմանված արդարացի հատուցման համար:

Այս մասին որոշման նախագիծը ներառված է այսօր կայանալիք կառավարության նիստի օրակարգում: Մարդու իրավունքների եվրոպական դատարանի վճռի համաձայն` ՀՀ–ը դիմումատուին պարտավոր է վճիռն օրինական ուժի մեջ մտնելուց հետո երեք ամսվա ընթացքում վճարել 50 հազար 165 եվրոյին համարժեք դրամ:

Նշված գործով Մարդու իրավունքների եվրոպական դատարանի վճռով սահմանված հատուցման գումարի վճարման վերջնաժամկետը մայիսի 24–ն է: Դիմումատուն Հայաստանի քաղաքացի Հրաչյա Մուրադյանն է, ում որդին 2001 թ. զորակոչվել էր բանակ և ծառայության է նշանակվել ԼՂՀ զինված ուժերում: Մեկ տարի անց դիմումատուի որդու առողջական վիճակը սկսել է վատանալ։ Վիճակի վատթարանալուց հետո նա տեղափոխվել է Մեխակավանի զինվորական հոսպիտալ։

Հաջորդ օրը վերակենդանացման բաժանմունքի բժիշկն արձանագրել է նրա մահը: 2002 թ. օգոստոսի 6–ին դատաբժշկական փորձագետն արձանագրել է, որ դիմումատուի որդին մահացել է սուր ներքին արյունահոսությունից, որովայնի ներքին բութ վնասվածքի ձախ թուլակողի շրջանում հին ու նոր արյունազեղումների առկայությամբ փայծաղի պատռվածքի հետևանքով: 2002 թ. օգոստոսի 7–ին հարցաքննված դիմումատուի որդու ծառայակիցները նշել են, որ դիմումատուի որդու և երկու սպաների միջև տեղի է ունեցել վիճաբանություն ենթադրաբար գողացված ժամացույցի շուրջ: 2004 թ. ապրիլին երկու սպաներից մեկը՝ Վ.Գ.–ն, կրկին հարցաքննվել է:

Պարզվել է, որ նախկինում տրված ցուցմունքների ժամանակ նա չի ներկայացրել ողջ ճշմարտությունը և 2002 թ. հուլիսի 21–ին իր և դիմումատուի որդու միջև տեղի ունեցած վիճաբանության ժամանակ ինքն աջ ձեռքով բռնել է վերջինիս ձախ դաստակը և սկսել է ուժեղ թափահարել այն, որի ընթացքում դիմումատուի որդու բռունցքը կպել է նրա որովայնին՝ փայծաղի շրջանում: Պաշտոնական քննության արդյունքների համաձայն՝ դիմումատուի որդու փայծաղի պատռվածքի առաջացման պատճառ հանդիսացել է այդ պատահական ֆիզիկական կոնտակտը:

2005 թ. ապրիլին նախաքննությունն ավարտվել է, սպա Վ.Գ.–ին և զինվորական երկու բժիշկներին առաջադրվել է մեղադրանք: Վ.Գ.–ն դատապարտվել է հինգ տարի, իսկ զինվորական երկու բժիշկները համապատասխանաբար չորս և երեք ու կես տարի ազատազրկման, սակայն համաներման ակտի կիրառմամբ ազատվել են պատժից:

Եզրահանգելով, որ իշխանությունների կողմից իրականացված քննությունն արդյունավետ չի եղել՝ Եվրոպական դատարանը դիմումատուի որդու կյանքի համար վտանգավոր վնասվածքի, ինչպես նաև նրա մահվան փաստի վերաբերյալ բացատրությունը չի համարել համոզիչ և բավարար: Նշենք, որ «Մուրադյանն ընդդեմ Հայաստանի» գործով վճիռն առաջինն է ՀՀ դեմ կայացված վճիռներից, որով Եվրոպական դատարանն արձանագրել է Կոնվենցիայի 2–րդ հոդվածի խախտում:

 

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ