«Հայոց արծիվները» սատարում է Տարոն Մարգարյանին

 «Հայոց Արծիվներ» հայրենասիրական հասարակական կազմակերպությունը կոչ է անում Երևանի ավագանու ընտրություններում սատարել Տարոն Մարգարյանի թեկնածությունը: «Արմենպրես»-ը ներկայացնում է ՀԿ հիմնադիր նախագահ Խաչիկ Ասրյանի հայտարարությունը.

««Հայոց Արծիվներ» հայրենասիրական հասարակական կազմակերպության խորհուրդը, կազմակերպության բազմահազար անդամները և անձամբ ես քվեարկելու ենք ներկայիս քաղաքապետ Տարոն Մարգարյանի օգտին:

Մեր դիրքորոշումը հիմնավորված է ու պատճառաբանված, որովհետև վերջին տարիներին Տարոն Մարգարյանի  ջանադիր և պատասխանատու աշխատանքի շնորհիվ Երևանը, հիրավի, դարձել է միջազգային չափանիշներին համահունչ քաղաք: Կատարված աշխատանքների շրջանակը հսկայական է՝ շրջանցիկ ավտոճանապարհների կառուցում, բակերի ու պուրակների բարեկարգում, բնակչության շրջանում առողջ ապրելակերպն արմատավորելու համար բազմաթիվ խաղահրապարակների կառուցում, մարզադահլիճների  վերանորոգում, Շենգավիթ և Կարմիր բլուր  հնավայրերը թանգարանային տեսքի բերելու նախաձեռնությու ններ, քաղաքի արտաքին հարդարման հարցում կարգ ու կանոնի հաստատում,  հայոց բանակում ծառայողների ծնողների այցի պարբերական կազմակերպում սահմանապահ զորամասեր և այլ խնդիրների լուծում, որոնք պահանջում էին ամենօրյա եռանդուն աշխատանք:

Հազարամյակների խորքից եկող Երևանը Հայաստանի և աշխարհի ողջ հայության հպարտությունն է եւ սիրտը, ու նրա արժանապատիվ   ընթացքով է  նախևառաջ պայմանավորված հայոց անկախ պետականության առողջ բաբախյունը: Որպեսզի քաղաքը շարունակի ծաղկել ու բարգավաճել հայ մարդու իղձերին համապասխան, անհրաժեշտ է, որ  քաղաքապետն ու քաղաքը նույն կենսագրության շաղախով կապված լինեն միմյանց հետ: Տարոն Մարգարյանն այդ ժառանգության ու տեսակի երեւելի կրողներից է, մեծանուն հայ, ազգային, պետական, քաղաքական գործիչ, լուսահոգի  Անդրանիկ Մարգարյանի որդին ու նրա գ ործի արժանավոր շարունակողը:

Օրեցօր ընդարձակվող ու բարեկարգվող քաղաքն այսօր էլ բազում հոգսեր ունի, որոնց լուծման պատասխանատվությունն իր վրա է վերցրել մայրաքաղաքի լուսաբացներն իր աշխատասիրությամբ ու պատասխանատվությամբ ամեն օրն ավետող երիտասարդ քաղաքապետ Տարոն Մարգարյանը:

Մեր ձայնը տալով Տարոն Մարգարյանին՝ նշանակում է, որ քվեարկում ենք առողջ Երևանի ու Երևան քաղաքի առողջ բնակչի համար: Վստահելով Տարոն Մարգարյանին՝ մենք վստահությամբ ենք լցվում Երևան քաղաքի վաղվա  օրվա հանդեպ:

Եվ այդ ամենը՝ քաղաքը մերը համարելու սրտացավությամբ ու նրա ստեղծարար կյանքին ակտիվորեն մասնակցելու պատրաստակամությամբ ու պատասխանատվությամբ:

Արժանավոր քաղաքին՝ արժանի քաղաքապետ. սա է վերընտրվող քաղաքապետ Տարոն Մարգարյանի կողքին լինելու «Հայոց Արծիվներ»-ի դիրքորոշումը»: