Երեւանցիների 72.3 տոկոսը ձայնը տալու է Տարոն Մարգարյանին. քաղաքապետի թեկնածուները բարելավել են դիրքերը

Երեւանցիների 72.3 տոկոսը առաջիկայում Երեւանի ավագանու ընտրություններին ձայն է տալու ՀՀԿ-ին և քաղաքապետի թեկնածու Տարոն Մարգարյանին: Gallup International Association-ի Հայաստանում լիիրավ անդամ «Էմ Փի Զի» ՍՊԸ տնօրեն Արամ Նավասարդյանը ներկայացրեց կազմակերպության կողմից իրականացված վերջին հետազոտության արդյունքները մայիսի 14-ին կայանալիք Երեւանի ավագանու ընտրությունների վերաբերյալ:

Նա տեղեկացրեց, որ հարցումներն իրականացվել են 1074 մարդկանց շրջանում, մեթոդը՝ դեմ առ դեմ, իրականացման ժամանակահատվածը՝ մայիսի 2-9-ը:  Կիրառվել է բազմաստիճան քվոտային ընտրանք, ընդգրկվել են Երեւան քաղաքի 12 վարչական շրջանները:

«Նիկոլ Փաշինյանին ձայն է տալու քաղաքացիների 15.5 տոկոսը, իսկ Զարուհի Փոստանջյանին՝ 4.7 տոկոսը»,- ասաց Արամ Նավասարդյանը՝ ընդգծելով, որ նախորդ հետազոտությունից հետո թեկնածուները բարելավել են դիրքերը:

Ըստ «Երևան քաղաքի քաղաքապետի թեկնածուների վարկանիշներն առ մայիսի 10-ը» (2-րդ փուլ) խորագրով հետազոտության արդյունքների՝  հարցվածների 95,9 տոկոսը տեղյակ է, որ մայիսի 14-ին կայանալու են Երեւանի ավագանու ընտրություններ, իսկ 4.1 տոկոսը՝ ոչ:

«Քաղաքացիների 56,1 տոկոսը նշել է, որ հետևում է քարոզարշավին, իսկ 43.9-ը՝ ոչ: Հարցին, թե ընտրություններին մասնակցող որ քաղաքական ուժերի քարոզարշավին եք առավել շատ հանդիպել/տեսել, երեւանցիների 73,8 տոկոսը նշել է ՀՀԿ-ի, 46,3 տոկոսը՝ «Ելք» դաշինքի, 32,5 տոկոսը՝ «Երկիր Ծիրանի»-ի»,-ներկայացրեց Արամ Նավասարդյանը:

Երեւանցիների մեծամասնությունը (84.6%) քարոզարշավի հրապարակումների հանդիպել է հիմնականում հեռուստացույցով, ապա բակերում եւ սոցիալական ցանցերում:

Հետազոտության արդյունքների համաձայն՝ քաղաքացիների 57.2 տոկոսը ծանոթացել է քաղաքական ուժերի նախընտրական ծրագրերին, 78.5 տոկոսը պատասխանել է, որ ծանոթացել է ՀՀԿ, 47.4 տոկոսը՝ «Ելք» դաշինքի, իսկ 36.5 տոկոսը՝ «Երկիր Ծիրանի» կուսակցության նախընտրական ծրագրին:

«Քաղաքացիների 80.4-ը նախընտրական ծրագրերին ծանոթացել է հեռուստացույցի միջոցով: 83.3% մասնակցում է բակերում, համայնքներում իրականացվող հանդիպումներին, իսկ 16.7 տոկոսը՝ ոչ: 80.4 տոկոսը մասնակցում է ՀՀԿ-ի, 20.7 տոկոսը «Ելք» դաշինքի, իսկ  11.2 տոկոսը՝ «Երկիր Ծիրանի» կուսակցության հանդիպումներին»:

Երեւանցիների 67.1 տոկոսը նշել է, որ միանշանակ մասնակցելու է  առաջիկա ընտրություններին:

Երկրորդ հետազոտության մեջ ընդգրկված հարցերից է օրինակ՝ որքանով եք կարևորում Երևան քաղաքում էլեկտրատրանսպորտի տեսակների զարգացումը: Քաղաքացիների մեծամասնությունը՝ 86.7 տոկոսը շատ է կարեւոր մետրոյի զարգացումը, ապա տրոլեյբուսի եւ տրամվայի:

Երեւանցիներն ամռանը քաղաքում հիմնականում ցանկանում են տեսնել բացօթյա հաﬔրգներ, մանկական ﬕջոցառուﬓեր, ամառային ճամբարներ, քաղաքային և համայնքային սպորտային օլիմպիադաներ, պարային համույթների հաﬔրգներ, հայկական ուտեստների փառատոններ, հեծանվային արշաﬖեր:

Հարցին, թե ինչպես եք գնահատում քաղաքապետարանի/թաղապետարանների կողﬕց իրականացվող հուշարձանների պահպանման ﬕջոցառուﬓերը, քաղաքացիների 44.8 տոկոսը պատասխանել է՝ ավելի շուտ դրական, 20.9 տոկոսը՝ լիովին դրական, իսկ 11.1 տոկոսը՝ ընդհանրապես բացասական:

Արամ Նավասարդյանը նշեց, որ հետազոտությունից հետո դեռեւս մի քանի օր շարունակվող քարոզարշավի ընթացքում փոփոխություններ հնարավոր է տեղի ունեցած լինեն, սակայն հետազոտությունը ցույց է տալիս ընդհանուր պատկերը: