Ռուսաստանի միջամտությունը Սիրիայում ձախողում է Թուրքիայի ծրագրերը. թուրքագետ

Ռուսաստանի ռազմական միջամտությունը Սիրիայում վկայում է Թուրքիայի` Սիրիայի նկատմամբ վարած քաղաքականության ձախողման մասին: Հոկտեմբերի 8-ին լրագրողների հետ հանդիպմանը նման դիտարկում արեց թուրքագետ Հակոբ  Չաքրյանը: «Թուրքիայի վարած քաղաքականությունն արդեն ձախողված է, քանի որ Թուրքիան ի սկզբանե պնդում էր, որ պետք է Բաշար Ասադն իր նախաձեռնությամբ տապալվի և Թուրքիան նոր իշխանություններ ստեղծի ու իր դիրքերն ամրապնդի Սիրիրայում: Սիրիական պատերազմից անցել է 4 տարի և Բաշար Ասադը դեռ իր տեղում է»-, նշեց թուրքագետը

Չաքրյանը նշեց, որ Ռուսաստանի միջամտությունը կլուծի նաև գաղթականների խնդիրը, ըստ Վլադիմիր Պուտինի հայտարարության ենթադրվում է, որ խնդրի լուծումը կտևի 3-4 ամիս: «Գաղթականների հարցը կլուծվի, եթե այդ ամիսների ընթացքում հնարավոր լինի վերջ տալ ահաբեկչական խմբավորումների գործունեությանը և  ի սպառ ոչնչացնել նրանց կառույցները, որոնց շարքերում մոտավորապես 15 հազար չեչեն և կովկասցի, գրեթե նույնքան էլ թուրք ահաբեկիչներ կան»,-հավելեց նա:

Անդրադառնալով  նաև  ԱՄՆ-ի` Ռուսաստանին արված կոչին, որում մասնավորապես ասվում է  չափավոր ընդիմադիներին ձեռք չտալ և կենտրոնանալ միայն ջիհադականների վրա, թուրքագետն ասաց, որ երկու խմբավորումներում էլ մարդասպաններ են, չափավոր ընդդիմադիրների ու ջիհադականների  միակ տարբերությունն այն է, որ որ մեկը գտնվում է ԱՄՆ-ի, իսկ մյուսը Թուրքիայի վերահսկողության տակ: