«Թամարա Ֆրութ»–ի արտադրանքը կհամտեսեն Էմիրաթների հինգաստղանի հյուրանոցի հյուրերը

Երեկ օրգանական և բնական միրգ–բանջարեղենից պատրաստված պահածոներով, մուրաբաներով և հյութերով բարձված առաջին բեռնատարն ուղևորվեց դեպի Արաբական Միացյալ Էմիրություններ՝ 5+–աստղանի հյուրանոցներին մատակարարելու համար։ Այս մասին կարդում ենք Տնտեսական զարգացման և ներդրումների նախարարության կայքում: Պայմանագիրը կնքվել է «Թամարա Ֆրութ» և «Al Falaj» ընկերությունների միջև «Հայաստան–Արաբական Միացյալ Էմիրություններ» ներդրումային համաժողովի ընթացքում։ Ըստ այդմ, մեր հայկական արտադրանքը կմատակարարվի Էմիրաթների լավագույն հյուրանոցներից մեկում՝ «Al Falaj»–ում:

Ըստ նախարարության կայքի՝ արաբական գործընկերն արդեն 15 կոնտեյներ հայկական օրգանական և բնական արտադրանք է պատվիրել։ Ընդ որում հայկական արտադրանքն արաբական երկրների հյուրանոցներում կտարածվի NOHF (Natural organic healthy food– բնական, օրգանական, առողջ սնունդ) մակնշմամբ: Երեկ Հայաստանի զարգացման հիմնադրամի գործադիր տնօրեն Արմեն Ավակ Ավակյանը, արտահանման գծով տնօրեն Հայկ Միրզոյանը և ՀՀ տնտեսական զարգացման և ներդրումների նախարարության Ճյուղային տնտեսական քաղաքականության վարչության պետ Արմեն Եգանյանն այցելել են «Թամարա Ֆրութի» պահեստներ, հետևել արտահանման ընթացքին, գործարարի հետ քննարկել հնարավոր խնդիրներն ու աջակցման նոր ծրագրեր։

«Հիմնադրամը շարունակելու է գործունեությունն արտահանման զարգացման ուղղությամբ, քանի որ արտահանումը Հայաստանի տնտեսության լոկոմոտիվներից մեկն է»,– նշել է ՀԶՀ գործադիր տնօրեն Արմեն Ավակ Ավակյանը։ Սրա հետ մեկտեղ ցանկանում ենք նշել, որ այս տարվա վերջին՝ ապրիլյան տվյալներով, որը տրամադրել է Ազգային վիճակագրական ծառայությունը, Հայաստանի ու ԱՄԷ–ի առևտրաշրջանառությունը այս տարվա առաջին երեք ամիսներին կազմել է 43 միլիոն 904 հազար ԱՄՆ դոլար, իսկ սա ավելի քան երկուսուկես անգամ ավելի է նախորդ տարվա նույն ժամանակահատվածի համեմատությամբ:

Ընդ որում վերևում նշված առևտրաշրջանառության ընդհանուր գումարի մոտ կեսը՝ 19 միլիոն 483 հազար ԱՄՆ դոլարը միայն արտահանման գումարն է: Ներմուծումը այս դեպքում տարանջատվում է երկու տեսակի՝ ըստ առևտուր անող երկրի և ըստ ապրանքի ծագման: Ըստ առևտուր անող երկրի՝ այս տարվա հունվար–մարտ ամիսներին մենք արաբական երկրից ներմուծել ենք 51 միլիոն 13 հազար ԱՄՆ դոլարի, իսկ ըստ ապրանքի ծագման՝ 24 միլիոն 421 հազար ԱՄՆ դոլարի ապրանք:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ