Սնանկացած գործարարը սպանել է գուշակուհուն, որին 20 տարի հավատում էր

59-ամյա վոլգոգրադցին 15 անգամ դանակով հարվածել է այն գուշակուհուն, որին մեղադրում է իր բոլոր դժբախտությունների մեջ։ Կինը մահացել է, այդպես էլ ուշքի չգալով, հիվանդանոցի վերակենդանացման բաժանմունքում, հայտնում են տեղի լրատվամիջոցները։

Ընդ որում 59-ամյա վոլգոգրադցին կամավոր եկել է ոստիկանություն ու հայտնել, որ սպանել է 60-ամյա Իրինա Ս․-ին։ Օպերատիվ աշխատակիցները մեկնել են տղամարդու նշած հասցեով։ Կինը անգիտակից էր, բայց դեռ ողջ էր։ Նրան տեղափոխել են հիվանդանոց, սակայն նա մեկ օր անց մահացել է։

Սպանությունը, ինչպես նաեւ իր հետագա գործողությունները տղամարդը նախապես էր ծրագրել։ Նա մտադիր չէր թաքնվել, նրա համար գլխավորը վրեժխնդիր լինելն էր։ Գուշակուհու մոտ գնալուց առաջ նա հավաքել էր իր բոլոր իրերը, որոնք կարող էին անհրաժեշտ լինել քննչական մեկուսարանում, վերցրել որսորդական դանակն ու եկել Իրինայի տուն։

Տղամարդը քննիչներին պատմել է, որ քսան տարի առաջ գործարար է եղել, գործերը հոյակապ էին մինչեւ որոշակի պահ, որից հետո սկսել են վատանալ։ Այդ ժամանակ նա դիմել է գուշակուհու՝ այդ նույն Իրինային։ Տարիներ շարունակ նա ամեն ամիս գալիս էր այդ գուշակուհու մոտ, լսում նրա գուշակությունները, բայց գործերը չէին լավանում։

Վերջապես անտաղանդ գուշակություններից հոգնել է ու խզել կապը գուշակուհու հետ։ Իսկ Իրինան, որն արդեն սովորել էր կանոնավոր այցելություններին ու ստացած գումարներին, սպառնացել է տղամարդուն, որ նրան չի հաջողվի հենց այնպես խզել կապը սեւ մոգության հետ։ Դրանից հետո տղամարդու կյանքում սկսվել է փորձանքների շարան, մահացել են մայրը, ընտանի կենդանիները, զրկվել է վերջին փողերից ու բնակարանից։

Այդ ժամանակ էլ նա հասկացել է, թ ե ինչ է պետք անել։ Քննության տվյալներով, տղամարդը չի խմում, նա բարձրագույն տնտեսագիտական կրթություն ունի։ Եղել է բանկերի ղեկավար ու գործարար։ Ի սկզբանե նրա դեմ հարուցվել էր «Մահափորձ» հոդվածով քրեական գործ, որը հետո վերաորակավորվել է «Սպանության»։

Տղամարդն անկեղծորեն ասում է, որ ինքը վերադառնալու տեղ չունի, դրա համար էլ իր համար առավելագույն պատժամիջոց է խնդրում։ Որպեսզի մահանա բանտում։