Արամ Խաչատրյանի անվան մրցույթի հաղթողները դրամական պարգևների կարժանանան

ՄՇԱԿՈՒՅԹ 16 Մայիս, 2017 11:57

Արամ Խաչատրյանի անվան 13-րդ միջազգային մրցույթն ավանդույթի համաձայն կմեկնարկի հունիսի 6-ին կոմպոզիտորի ծննդյան օրը «Արամ Խաչատրյան» համերգասրահում: Այս տարի առաջին անգամ կանցկացվի մրցույթ նաև վոկալ մասնագիտությամբ, որի համար 100-ից ավելի հայտեր են ստացվել: Այս մասին «Արմենպրես»-ի թղթակցին պատմեց «Արամ Խաչատրյան մրցույթ» մշակութային հիմնադրամի գործադիր տնօրեն Աննա Տեր-Հովակիմյանը:

«Մրցույթի առաջին փուլերը, ըստ մասնագիտությունների, կանցկացվեն հունիս 7-ին և 8-ին, որոնց ժամանակ ելույթ կունենան նախընտրական փուլում հաղթած 43 մասնակից, երկրորդ փուլերը կկայանան հունիսի 9-ին, 10-ին: Կմասնակցեն 20 երաժիշտ: Երրորդ փուլ անցած 10 մասնակիցը հունիսի 11-ին իրենց համարները կփորձեն մրցույթի պաշտոնական՝ Հայաստանի երիտասարդական նվագախմբի հետ, որպեսզի ըստ արժանվույն ներկայանան հունիսի 12-ին և 13-ին կայանալիք երրորդ փուլում, որի ընթացքում կորոշվեն հաղթողները»,-ասաց տնօրենը:

Աննա Տեր-Հովակիմյանի խոսքով՝ Արամ Խաչատրյանի անվան միջազգային մրցույթի կազմկոմիտեն սահմանել է հետևյալ մրցանակները՝ առաջին մրցանակ՝ 10 000 ԱՄՆ դոլարին համարժեք դրամ, երկրորդ՝ 5000 ԱՄՆ դոլարին համարժեք դրամ, երրորդ մրցանակ` 3000 ԱՄՆ դոլարին համարժեք դրամ: Կլինեն նաև հատուկ մրցանակներ, որոնք սահմանելու են մրցույթի գործընկերները:

Տնօրենն ընդգծեց, որ ոչ բոլոր ցանկացողները կկարողանան մասնակցել մրցույթին, քանի որ իրենց սահմանած չափանիշները բավականին բարձր են, և, հավանաբար, դա է պատճառը, որ տարիների ընթացքում մասնակիցների մասնագիտական մակարդակն ավելի է բարձրանում:

Մրցույթին ներկայանալու են երաժիշտներ աշխարհի տարբեր երկրներից՝ Հարավային Աֆրիկայից, Կանադայից, ԱՄՆ-ից, Մեծ Բրիտանիայից և այլն:

Ժյուրիի նախագահը Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար և տնօրեն Կոնստանտին Օրբելյանն է, անդամները՝ Նյու Յորքի «Մետրոպոլիտեն» թատրոնի երաժշտական տնօրեն Ջոն Ֆիշերը, մեներգիչ Գևորգ Հակոբյանը և այլք: Երաժիշտ-հյուրեր կլինեն ԱՄՆ-ից, Իտալիայից, Լատվիայից:

Հայաստանյան լրատվամիջոցներից բացի`միջոցառումը լուսաբանելու են նաև այլ երկրների ԶԼՄ-ներ:

Մրցույթն անցկացվում է Հայաստանի Հանրապետության նախագահի տիկին Ռիտա Սարգսյանի բարձր հովանավորությամբ, ՀՀ մշակույթի նախարարության աջակցությամբ, «Արամ Խաչատրյան մրցույթ» մշակութային հիմնադրամի և Երևանի Կոմիտասի անվան պետական կոնսերվատորիայի նախաձեռնությամբ:

Հիշեցնենք, որ 2006 թվականին Արամ Խաչատրյանի անվան մրցույթում հաղթել է անվանի թավջութակահար Նարեկ Հախնազարյանը: