Գեղարքունիքի մարզում թունաքիմիկատներով թունավորման դեպքերի աճ է արձանագրվել

Գեղարքունիքի մարզում, 2017 թվականի գարնան գյուղատնտեսական աշխատանքների ակտիվացման շրջանի ընթացքում, արդեն արձանագրվել է թունաքիմիկատներով թունավորման 1 դեպք, որը, բարեբախտաբար, չի ավարտվել մահվան ելքով:

 

Ինչպես  տեղեկացրեց ՀՀ ԱՆ «Հիվանդությունների վերահսկման եւ կանխարգելման ազգային կենտրոն» ՊՈԱԿ «Գեղարքունիք» մասնաճյուղի տնօրեն Գոհար Սարգսյանը, ի տարբերություն մարզում 2015 եւ 2017 թվականներին գրանցված մեկական դեպքերի, անցած տարի արձանագրվել է ունաքիմիկատներով թունավորման դեպքերի զգալի աճ՝ 11 դեպք:

 

«Հիվանդացման ցուցանիշը 100000 բնակչի հաշվարկով կազմում է 4.73 (հանրապետական միջին ցուցանիշը 6.3 է): Դեպքերից 6-ն արձանագրվել է Մարտունու, 3-ը՝  Գավառի, 1-ը՝  Սեւանի եւ 1-ը՝  Վարդենիսի տարածաշրջաններում:

Գեղարքունիքի  մարզում  2015  եւ  2016 թվականներին   թունաքիմիկատներից  թունավորման  պատճառով մահվան դեպքեր չեն գրանցվել, ինքնասպանության նպատակով թունաքիմիկատների օգտագործման դեպքեր նույնպես չեն արձանագրվել: 2016 թվականի 11 թունավորվածներից 8-ը արական սեռի են, 7-ը՝ 1-5 տարեկան երեխաներ:

 

Դեպքերի գերակշիռ մասը՝ 8 դեպք, առաջացել են թունաքիմիկատը պատահաբար խմելու պատճառով, այսինքն՝ հետեւանք են թունաքիմիկատների ոչ ճիշտ  պահպանման: Այդ մասին է վկայում նաեւ այն փաստը, որ թունավորվածներից 7-ը երեխաներ են, որոնք ծնողների անուշադր ության հետեւանքով ալիմենտար ճանապարհով թունավորվել են:

 

Դեպքերից միայն 3-ն են, որ առաջացել են գյուղատնտեսական աշխատանքների կատարման ընթացքում՝ սեփական հողամասերը թունաքիմիկատներով մշակելու ժամանակ անհատական պաշտպանիչ միջոցներ  չօգտագործելու եւ թունաքիմիկատների հետ աշխատանքի անվտանգության կանոններին չտիրապետելու պատճառով»,- ներկայացրեց Գոհար Սարգսյանը: Թունաքիմիկատների անվտանգ օգտագործման նպատակով ՀՀ ԱՆ «Հիվանդությունների վերահսկման եւ կանխարգելման ազգային կենտրոն» ՊՈԱԿ «Գեղարքունիք» մասնաճյուղի աշխատակիցնրը բնակչության շրջանում բացատրական աշխատանքներ են տանում մարզում գործող զանգվածային լրատվության միջոցներով եւ անհատական կարգով: