Մնում է պարզել՝ Russia–gate, Moscow–gate, թե՝ Kremlin–gate

ՄԻՋԱԶԳԱՅԻՆ 18 Մայիս, 2017 19:14

ԱՄՆ նախագահ Դոնալդ Թրամփի և ՌԴ ԱԳ նախարար Սերգեյ Լավրովի՝ Սպիտակ տանը կայացած հանդիպման հետ կապված սկանդալը նոր թափ է առնում: Ամերիկյան իսթեբլիշմենթը Թրամփին մեղադրում է ռուսներին գաղտնի տեղեկատվություն փոխանցելում, իսկ ՏԱՍՍ–ի հրապարակած լուսանկարը համարվում է Օվալաձև սենյակի գորգի տակ հարմարեցված տեսաձայնագրող սարքի արդյունք: Իբր՝ Լավրովի և ԱՄՆ–ում ՌԴ դեսպան Սերգեյ Կիսլյակի հետ միասին Սպիտակ տուն են ներթափանցել ռուս գործակալներ, որոնք, ի թիվս Թրամփի՝ ռուսներին մատուցած գաղտնի տեղեկատվության, իրենց հերթին են առատ ավարով այնտեղից դուրս եկել:

Ամերիկյան փորձագետները, հաշվի առնելով նաև նախագահի էքս–թեկնածու Հիլարի Քլինթոնի վերադարձը մեծ քաղաքականություն, համոզված են, թե այս նոր դիպվածը կարող է Թրամփի իմփիչմենթի համար լեգիտիմ հիմք դառնալ, որովհետև Կոնգրեսում ոմանք սկսել են նույնիսկ պետական դավաճանության վերաբերյալ խոսել: Սակայն, կայն նաև այնպիսիք, որոնք պնդում են, թե Սպիտակ տանը կայացած մեկուսի զրույցի հրապարակայնացումը իսթեբլիշմենթի և Թրամփի հանդեպ վերապահումներ ունեցող հետախուզական կառույցների ձեռքի գործն է, ինչն, իհարկե, շատ դժվար է ապացուցել: Անգամ եթե ֆիքսենք, որ սա առաջին դեպքը չէր, որ ինքը՝ Թրամփը նույնպես հաճախ է կասկածներ հայտնել այն մասին, թե իրեն գաղտնալսում են, իսկ Ռոյթըրզը օրերս չէր էլ թաքցրել, որ նոր վարչակազմի աշխատակազմում իսկապես կան մարդիկ, որոնք, հարկ եղած դեպքում, իրե՛նք են ջանում անհրաժեշտ լուրը հանրայնացնել...

Բայց այդ ի՞նչ տեղեկություն է Թրամփը հաղորդել ռուսներին, որ նույնիսկ պետական դավաճանության երանգ է ստացել Կոնգրեսում՝ կհարցնեք: Պարզվում է՝ պատմության ակունքներում Washington Post թերթն է կանգնած, որն անցած շաբաթվա վերջում, առանց որևէ ապացույց ներկայացնելու, մի փոքր նյութ հրապարակեց, իբր՝ Թրամփը Լավրովի հետ կիսվել է ԴԱԻՇ–ին վերաբերող գաղտնի տեղեկատվությամբ: Իբր՝ Իսրայելը ԴԱԻՇ–ում Մոսադի գործակալ ունի, որի մասին հայտնել է Թրամփին, և հիմա, երբ նա այդ մասին հայտնել է Լավրովին, դավաճանել է պետությանը և վտանգել գործակալին, որն այլևս չի կարողանա նաև ԱՄՆ օգտին աշխատել: Այլ աղբյուրներ էլ ուրիշ փակագծեր բացեցին, իբր՝ հենց այդ գործակալի միջոցով է պարզվել, որ ԴԱԻՇ–ը պատրաստվում է նոթբուքի միջոցով պայթեցնել ԱՄՆ նախագահի ինքնաթիռը, և դա էր պատճառը, որ ԱՄՆ–ում և Բրիտանիայում վերջերս առհասարակ արգելեցին դրանցով ինքնաթիռ բարձրանալ:

Այսպիսով, եթե հետևենք այս տրամաբանությանը, Թրամփը շարունակական գործարքի մեջ է ռուսների հետ, ավելին՝ պարանով կապված է Պուտինի սայլին և շուռումուռ է գալիս այնպես, ինչպես Կրեմլում են պահանջում: Եվ չնայած մեջտեղում որևէ կոնկրետ ապացույց չկա, միևնույն է, համակարգը տարօրինակ այս շամանիզմով կամենում է նոր Ուոթերգեյթ սարքել (1972–74 թթ. դեմոկրատները հանրապետական նախագահ Ռիչարդ Նիքսոնին մեղադրեցին դեմոկրատների շտաբներում գաղտնալսող սարքերի տեղադրելում՝ հասնելով նրա հրաժարականին) Թրամփի գլխին: Russia–gate, Moscow–gate, Kremlin–gate. դեմոկրատներն արդեն հարմար անուն են որոնում ապագա պրոցեսի համար՝ չլսելով նույնիսկ ԱՄՆ ազգային անվտանգության հարցերով խորհրական Հերբերտ Մաքմասթերի, նույն հարցերով մեկ այլ խորհրդական և բոլորի համար ընդունելի, ժամանակին Բուշի աշխատակազմում գլխապտույտ կարիերա արած Դինա Փաուելի, պետքարտուղար Ռեքս Թիլերսոնի բացատրությունները: Ըստ վերջիններիս՝ Դոնալդ Թրամփը Լավրովի հետ քննարկել է հակաահաբեկչական պայքարի հետ կապված հարցեր, այդ թվում՝ քաղաքացիական ավիացիային առնչվող, սակայն, չեն քննարկվել ոչ աղբյուրներ, ոչ կոնկրետ տեղեկություններ, ոչ պայքարի ձևեր, առավել ևս՝ ռազմական օպերացիաների մանրամասներ: Ուստի, Սպիտակ տունը չգիտի, թե որտեղ է ծնվել շրջանառվող վարկածը:

Ի դեպ, եթե վարկածից ենք խոսում, նշենք, որ այդպիսի մեկն էլ կա. հաշվի առնելով այն հանգամանքը, որ աղմուկին միացել է նաև Իսրայելը, որտեղ, ըստ Կուրսորի, կառավարական կուլուարներում նույնպես Թրամփի անզգուշության մասին են խոսում, որոշ փորձագետներ տեսակետ են հայտնում, թե այս ամենի հետևում Իսրայելն է կանգնած, որն, իբր, պատժում է Թրամփին դեսպանատունը Երուսաղեմ արագ չտեղափոխելու, Լացի պատի հատվածը Իսրայելի օրինական տարածք չհամարելու, Պաղեստինի ղեկավարի հետ ջերմ կապեր հաստատելու և այլնի համար: Այս վարկածի կրողները համոզված են, որ իրականում դեմոկրատները հրաշալի գիտեն այս մասին, բայց նրանք էլ իրենց հերթին են ուզում օգտվել իրավիճակից: Նաև առաջարկում են դիտարկել, թե ինչու չեն հրեաները նախկինի պես խանդավառ Թրամփի՝ Իսրայել սպասվող այցով…

Գոհար Սիմոնյան