Սերբիայի, Ուկրաինայի, Վրաստանի և Հայաստանի մասնագետները փորձի փոխանակություն են կատարում

Երևանում մեկնարկեց Եվրոպական միության աջակցության ծրագրավորման, կառավարման և համակարգման փորձի փոխանակմանը նվիրված երկօրյա աշխատաժողովը՝ Սերբիայի, Ուկրաինայի, Վրաստանի և Հայաստանի ԵՄ աջակցության համակարգման պետական մարմինների ներկայացուցիչների մասնակցությամբ։ Աշխատաժողովի նպատակն է ներկայացնել և քննարկել վերոնշյալ երկրներում ԵՄ աջակցության համակարգման մեխանիզմները և ընթացակարգերը, առկա գործիքակազմը և դրանց կիրառումը երկրների առաջնահերթ խնդիրների լուծման ընթացքում:

ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը նշեց, որ ՀՀ տնտեսական զարգացման և ներդրումների նախարարությունը, հանդես գալով որպես ԵՄ ծրագրերի կոորդինատոր, պարբերաբար նման միջոցառումներ է իրականացնում:

«Ինչպես բոլոր երկրներում, այնպես էլ Հայաստանում բարեփոխում իրականացնելու ճանապարհին հատկապես անհրաժեշտ է լինում կարևորել և ուսումնասիրել միջազգային փորձը, տեսնել, թե աշխարհում այդ մասով հաջողված ինչ օրինակներ կան, և որն է այն մասնագիտական կարողությունը, որը կարելի է ներդնել և այդ ոլորտում որոշակի փոփոխություններ իրականացնել: ԵՄ կողմից կիրառվող գործիքները, աջակցության մեխանիզմները հենց այն ճանապարհն են, որ մեզ ընձեռում են իրական հնարավորություն որոշակի ընտրված ոլորտներում բարեփոխումներ իրականացնելու համար: Այդ ճանապարհը սահո ւն և արդյունավետ կազմակերպելու համար առաջին հեթին պետք է մեր համապատասխան գերատեսչությունների և պատասխանատու կառույցների մոտ իմացության մակարդակը բարձրացնել, որպեսզի մեր գործընկերները տեղյակ լինեն ինչ հնարավոր գործիքներ կան, ինչպես է պետք դրանց համար դիմել, ինչպես կարելի է դրանք կիրառել Հայաստանում»,- ասաց Մելքոնյանը` հավելելով, որ աշխատաժողովին խոսելու են ԵՄ կողմից ֆինանսավորվող բոլոր աջակցության գործիքների` Թվինինգի, Թայեքսի, Սիգմայի և Անդրսահմանային համագործակցության մասին:

Փոխնախարարի խոսքով` վերոնշյալ բոլոր ծրագրերը Հայաստանում շարունակում են մնալ հասանելի, նայելով որոշ երկրների փորձը` քննարկելու են, թե ինչ փոփոխություններ են հնարավոր իրականացնել  այդ ծրագրերի կառավարման և նախաձեռնման մասով, որպեսզի Հայաստանում դրանք լինեն ավելի ծավալուն, խորքային և արդյունավետ: Ըստ Մելքոնյանի, այստեղ պարզապես մասնագիտական կարողությունների բարելավման, իմացության բարձրացման և որոշակի պահանջների ճշգրտման մասով են աշխատանքներ իրականացվում: Նա հավելեց, որ վերջին տարիներին ամենատարբեր ոլորտներում կատարված փոփոխո ւթյունները շատ դեպքերում հենց ԵՄ աջակցության գործիքների միջոցով են իրականացվել:

Հայաստանում ԵՄ պատվիրակության համագործակցության բաժնի ղեկավար Հոա-Բին Աջեմյանը նշեց, որ աշխատաժողովի շնորհիվ Հայաստանի, Սերբիայի, Վրաստանի և Ուկրաինայի մասնագետները ԵՄ աջակցության ծրագրերի շրջանակում կկիսեն իրենց կուտակած փորձը և կգտնեն լավագույնը:

«Հատկապես կփորձեն գտնել միջոցներ, որպեսզի Եվրոպայի հետ ավելի լավ համագործակցեն և աշխատեն: Միևնույն ժամանակ երկրներն արդեն մեկը մյուսից բավականին բան են սովորել, սակայն ամեն երկիր բարեփոխվելու տեղ ունի: ԵՄ-ն միասնականություն և բազմազանություն է, մեկս մյուսից շատ բաներ ունենք սովորելու»,- ասաց Աջեմյանը` հավելելով, որ գործիքներից օգտվելու մոտեցումները կարող են տարբեր լինել:

Աշխատաժողովին մասնակից երկրների ընտրության նպատակով կատարվել է ԵՄ աջակցություն ստացող մի շարք երկրների վերլուծություն, որի արդյունքում ընտրվել են Սերբիան, Վրաստանն ու Ուկրաինան: Միջոցառման առաջին օրը նվիրված էր ԵՄ-ի հետ համագործակցության ընդհանուր սկզբունքներին, ԵՄ աջակցության ծրագրավորման և ընդհանուր համակարգման աշխատանքներին, մասնակից երկրներում բյուջետային աջակցությանն առնչվող փորձին և գործող ընթացակարգերին:

Աշխատաժողովի մասնակիցները ներկայացրեցին իրենց երկրներում ԵՄ աջակցության ազգային համակարգող մարմինների կողմից ԵՄ պատվիրակություններիև պետական կառավարման մարմինների հետ համագործակցության փորձը` բերելով հաջողված օրինակներ և տրամադրելով գործնական խորհուրդներ:

Աշխատաժողովի երկրորդ օրը կներկայացվեն մասնակից երկրներում և Հայաստանում ԵՄ աջակցության գործիքներին (Թվինինգ, Թայեքս, Սիգմա, Անդրսահմանային համագործակցություն) և այլ ծրագրերի կիրառման և համակարգման փորձը, ինչպես նաև ԵՄ-ի հետ համագործակցության վերաբերյալ տեղեկատվության տարածման առանձնահատկությունները:

 Աշխատաժողովին մասնակցում են ՀՀ շահառու նախարարությունների և այլ պետական մարմինների ավելի քան 40 ներկայացուցիչ, ինչպես նաև Հայաստանում ԵՄ պատվիրակության ներկայացուցիչներ: