«Հայաստանի Բրիտանական դպրոց»-ը հունիսի 3-ին «Բաց դռներ»-ի օր է հայտարարել

 «Հայաստանի Բրիտանական դպրոց»-ը (BISA) պաշտոնապես հայտարարում է ավագ դպրոցի բացման և  2017-2018 ուստարվա ընդունելության  մասին:

Ինչպես հաղորդում է «Արմենպրես»-ը, BISA ավագ դպրոցը Փիրսոն միջազգային կրթական համալիրի (Pearson Education) կողմից լիազորված է 13-16 տարեկան աշակերտներին առաջարկել Էդեքսել ակադեմիկական որակավորումները (Edexcel Academic Qualifications) Հայաստանում: Դպրոցում բոլոր առարկաները դասավանդվելու են բրիտանական կրթական ծրագրի համապատասխան:

Շրջանավարտները ստանալու են Ա մակարդակի (Edexcel International Advanced Levels /A-Level/) ավարտական վկայական և հնարավորություն ուսումը շարունակել միջազգային առաջատար համալսարաններում, ինչպիսիք են Օքսֆորդը, Քեմբրիջը, Լոնդոնի համալսարանական քոլեջը (UCL) և այլ բարձրագույն ուսումնական հաստատություններ:

Ինչպես նշում է դպրոցի տնօրենը, «Հայաստանի Բրիտանական դպրոց»-ի  գերնպատակն է կրթությունը Հայաստանում հասցնել միջազգային մրցունակ մակարդակի և ընդլայնել ուսանողների կրթական հնարավորությունները արտասահմանում:

BISA ավագ դպրոցը նախնական մասնագիտական կրթություն ապահովող կարևոր այն օղակն է, որը մեծ դեր է խաղում աշակերտների  մասնագիտական ճիշտ կողմնորոշման հարցում: Դպրոցի կրթական հարցերով փորձառու  խորհրդատուները պատրաստ են ուղղորդել արտասահմանում ուսանել ցանկացող աշակերտներին:

Դասընթացներն իրականացվում են անգլերեն լեզվով, օրվա երկրորդ կեսին, ինչը հնարավորություն է տալիս կրթությունը «Հայաստանի Բրիտանական դպրոց»-ում զուգադրել  հանրակրթական դպրոցի հետ: Բացի հիմնական ծրագրից, BISA-ում աշակերտներն անցնելու են նաև TOEFL կամ IELTS անգլերենի և SAT մաթեմատիկայի իմացության քննությունների նախապատրաստական դասընթացներ:

«Հայաստանի Բրիտանական դպրոց»-ում հունիսի 3-ին, ժամը 15:00-ին տեղի կունենա «Բաց դռներ»-ի օր: Հանդիպման ընթացքում ծնողները և աշակերտները կտեղեկանան դպրոցի ընդհանուր դրույթների, ծրագրերի և ընդունելության կարգի մասին, ինչպես նաև կծանոթանան դպրոցին, կրթական միջավայրին, ուսուցիչների և անձնակազմի հետ:

Ավագ դպրոցի ընդունելությունն արդեն սկսված է, հայտերն ընդունվում են մինչև հունիսի 16-ը: