Փոստանջյանն ու Մուկուչյանը մերձեցան

 Armenia24.info-ն գրում է

 Երևանի ավագանու ընտրություններն արդեն անցյալում են։ Երկու հիմնական ուժերը ՝ ՀՀԿ-ն և «ԵԼՔ» դաշինքն ընդունել են ընտրությունների արդյունքները։ Այն վիճարկում է միայն «Երկիր ծիրանին», որն էլ թղթերի տրցակով եկել էր դիվանբաշու ՝ սույն դեպքում ԿԸՀ նախագահ Տիգրան Մուկուչյանի մոտ։ Նիստի հենց սկզբում պարզվեց, որ արդյունքները բողոքարկող կուսակցության ներկայացուցիչը, տվյալ դեպքում Արմեն Գաբրիելյանը նիստին չէր մասնակցում սկզբից։

Նիստի մեկնարկին Տիգրան Մուկուչյանը հայտարարեց, որ դիմումը ներկայացվել է կուսակցության լիազոր ներկայացուցիչ Արմեն Գաբրիելյանի կողմից: Կուսակցության նախագահ Զարուհի Փոստանջյանն ու նրա համախոհները հայտարարեցին, որ Գաբրիելյանը պատշաճ ծանուցված չի եղել այսօրվա նիստի վերաբերյալ, հետեւաբար նա չի կարողացել ներկայանալ նիստին, քանի որ Գյումրիում է այս պահին:
Պարզվեց, որ ոչ միայն տեղեկացվել է, այլ նույնիսկ զանգահարել են։ 21-րդ դարում, դա շատ հեշտ է ստուգել։ Սակայն, էլ ինչ Զարուհի Փոստանջյան, եթե աղմուկ չկա։ Ուստի տիկինը որոշեց ու ասեց, որ եթե իրենց թույլ չտան մասնակցել նիստին, ապա դա կդիտարկվի իրավունքի խախտում և կբողոքարկեն դատարանում։

Մուկուչյանը սակայն, նման բան չէր հայտարարել ու հորդորում էր Փոստանջյանին նստել։ Փոստանջյանը երևի «նստել» բայն այլ կերպ ընկալեց ու սկսեց Մուկուչյանին կոռեկտության կոչեր անել, փորձելով ապահովել շոուի բաղադրիչները։

Փոստանջյանի վարքագծից վաղուց պետք չէ զարմանալ։ Այս ամենին մենք արդեն սովոր ենք։ Պարզապես տարօրինակ է մի հանգամանք։ Հարկ եղած դեպքում, տիկին Փոստանջյանը ներկայանում է որպես իրավաբան։ Բայց չգիտես ինչու, ցանկացած օրենք փորձում է ներկայացնել յուրովի։ Անգամ այն դեպքում, երբ որևէ մեկը նրա գործողությունների վրա արգելք չի դնում։ Ակամայից հիշում ես կակտուսի մասին անեկդոտը։

Մարիա Պախուցկայա