Ռոհանիի վերընտրվելը Հայաստանի համար չափազանց ընկալելի և շահեկան է. Վարդան Ոսկանյան

 ՀՀ-ի համար շահեկան է, որ Իրանում կայացած նախագահի ընտրություններում նախագահ վերընտրվեց Հասան Ռոհանին:  Այսօր լրագրողների հետ զրույցում նման տեսակետ հայտնեց իրանագետ Վարդան Ոսկանյանը՝ նկատելով, որ նախագահի փոփոխության պարագայում նոր կառավարություն պետք է լիներ, որը կրկին պետք է հստակեցներ ձեռք բերված պայմանավորվածությունները, հաստատված ծրագրերը և այլն: Նրա խոսքով՝ Իրանում ընտրության արդյունքները ցույց տվեցին, որ Հայաստան-Իրան համատեղ որոշումները կյանքի կոչվելու մեծ հեռանկար ունեն:

«Իրանի նախագահ Հասան Ռոհանիի վերընտրումը ձեռնտու է Հայաստանին ժամանակային առումով: Եթե նոր նախագահ ընտրվեր, պետք է ձևավորվեր նոր կառավարություն, ճշգրտվեր ուղեգիծը: Գործող և վերընտրված նախագահ Ռոհանին Հայաստանի համար չափազանց ընկալելի, կանխատեսելի, արդեն իսկ Հայաստանի հետ գործակցության որոշակի փորձ, հաջողություններ գրանցած անձնավորություն է: Սակայն պետք է նաև նշեմ, որ Իրանի քաղաքական օրակարգը փոփոխվելու է: Ռոհանին թեև հսկայական թվով ձայներ հավաքեց՝ ավելին քան նախորդ ընտրություններում, միևնույն է՝ իրանցիների ակնկալիքներն աճել են՝ կապված երկրի ազատականացման, տնտեսական հաջողությունների և այլնի մասով: Նախագահ Ռոհանի վարչակարգը կարող ենք ասել, որ արտաքին քաղաքական օրակարգի գրեթե բոլոր կետերը կատարել է, մասնավորապես՝ մեծացրել է ազդեցությունը. մերձավորարևելյան տարածաշրջանի գրեթե բոլոր երկրներն այսօր առանց Իրանի, կարելի է ասել, որ որևէ խնդրի կարդինալ լուծում չեն տալիս»,- ասաց Ոսկանյանը:

Վերջինս գնահատմամբ՝ Իրանն այս ընտրություններով ավելի ամրապնդեց իր դիրքերն աշխարհում, քանի որ կարողացավ ընտրություններին ապահովել բարձր մասնակցություն, հետընտրական զարգացումներ չեղան: Ոսկանյանի խոսքով՝ Իրանը կշարունակի գործել Սիրիայում, Արաբական թերակղզում կունենա ազդեցություն, Աֆղանստանում և այլն:

Խոսելով վերընտրված նախագահից ՀՀ ակնկալիքներից, իրանագետը նկատեց, որ մի քանի ոլորտներում Հայաստանն ու Իրանն ակնհայտորեն արդեն իսկ գրանցել են հաջողություններ:

«Այդ հաջողությունները տարբեր մակարդակների վրա են: Եթե էներգետիկ ոլորտը հայ-իրանական հարաբերությունների շոգեքարշն է և հաջողությամբ զարգանում է, ապա մի շարք ոլորտներ կան, որոնք կաղում են: Խոսքը հատկապես հաղորդակցության ուղիների, ճանապարհների խնդրի մասին է: Հիշում ենք, որ անձամբ Ռոհանին է հայտարարել, որ Իրանը դիտարկում է Հայաստանը որպես կարևորագույն հանգուցային երկիր Պարսից ծոցը Սև ծովին կապող միջանցքի ծրագրում: Մենք հնարավորինս արագ պետք է իրականացնենք առնվազն այդ հաղորդակցության ուղիների առաջին բաղադրիչը՝ Հյուսիս-հարավ ավտոմայրուղին»,-շարունակեց նա:

Իրանագետը շեշտեց, որ այս պահին հայկական կողմը պետք է օրակարգից դուրս չթողնի հայ-իրանական երկաթուղու խնդիրը: Ոսկանյանը կարևորեց նաև Իրանի հետ եռակողմ, քառակողմ ձևաչափերով գործակցության ձևավորումը՝ ընդգրկելով մի կողմից Վրաստանին, որոշ պարագաներում ՌԴ-ին, Թուրքմենստանին և այլն:

«Մեր երկիրն ու Իրանը բանակցում են Հայաստան-Իրան-Թուրքմենստան գազային համաձայնագրի շուրջ: Մենք Վրաստանի հետ կրկին բանակցում ենք նման եռակողմ գազային համաձայնագրի շուրջ, այստեղ որոշակի առաջընթաց գրանցվել է: Այս ձևաչափը թույլ է տալիս Հայաստանի դերակատարությունը մեծացնել մեր ողջ տարածաշրջանում: Կարևոր է արագ իրականացնել նաև Սյունիքի մարզում ազատ տնտեսական գոտու ստեղծումը: Մենք ունենք հսկայական պոտենցիալ, որը պետք է առաջիկա տարիներին մեկը մյուսի հետևից իրացնենք:  Իրանական կողմը պատրաստակամ է այդ ծրագրերի իրականացման համար համագործակցել մեզ հետ»,- եզրափակեց Վարդան Ոսկանյանը: