ՀՀԿ–ական պահակն ու հողագործն ընդդեմ ՀՀԿ–ական գործող գյուղապետերի

ՔԱՂԱՔԱԿԱՆ 23 Մայիս, 2017 23:03

Ինչպես արդեն տեղեկացրել էինք այս տարվա հունիսի 18–ին Տեղական ինքնակառավարման մարմինների ընտրություններ տեղի կունենան հայաստանյան մի շարք մարզերում, այդ թվում՝ Արագածոտնի, Արարատի, Արմավիրի, Գեղարքունիքի, Լոռու, Կոտայքի և Շիրակի:

Այս ընտրություններում թեկնածուների գրանցման վերջնաժամկետ էր սահմանված մայիսի 19–ի ժամը 18:00–ը: Ըստ Կենտրոնական ընտրական հանձնաժողովի կայքի՝ արդեն իսկ կան առաջադրումներ:

Արագածոտնի մարզի Մեծամոր համայնքում գյուղապետի երկու թեկնածու կա: ՀՀԿ–ական գործող գյուղապետի՝ Մաջիտ Ամոյանի «դեմ» է դուրս եկել Մեծամորի հիմնական դպրոցի պահակը՝ կրկին ՀՀԿ–ական Թեմուր Քալաշյանը: Ի դեպ վերջինս ինքնառաջադրմամբ է հանդես եկել, իսկ գործող համայնքապետին աջակցում է Հանրապետական կուսակցությունը:

Արարատի մարզի Սուրենավան համայնքում նույնպես երկու թեկնածու կա՝ հանրապետական, գործող համայնքի ղեկավար Կարո Կարապետյանը և ԲՀԿ–ական, ինքնառաջադրմամբ հանդես եկած Վազգեն Ղազարյանը:

Արմավիրի մարզի Տարոնիկ համայնքում արդեն 3 թեկնածու կա և որն ամենահետաքրքիրն է՝ երեքն էլ անկուսակցական են: Պայքարի են դուրս եկել գործող գյուղապետ Արմեն Խլղաթյանը, գործազուրկ Գրիգոր Գրիգորյանը և «Ակբա Կրեդիտ Ագրիկոլ» բանկի վարկային գործակալ Պողոս Եղիազարյանը:

Շիրակի մարզի Հովիտ համայնքում նույնպես երկու ՀՀԿ–ական թեկնածու կա: Այստեղ արդեն գործող գյուղապետի՝ Ավետիք Սերոպյանի հետ «պայքարի» է դուրս եկել գյուղի հասարակ հողագործը՝ Արարատ Սահակյանը: Այս երկուսից իշխանական կուսակցությունը աջակցում է գործող գյուղապետին:

Շիրակի մարզի մեկ այլ համայնքում՝ Բայանդուրում, համայնքապետարանի համակարգչային օպերատոր, անկուսակցական Անի Գրիգորյանը նույնպես որոշել է ՏԻՄ ընտրությունների մասնակցել որպես թեկնածու: Նրա հակառակորդն է ՀՀԿ–ական գործող գյուղապետ Դավիդ Դավդյանը: Համակարգչային օպերատոր Անի Գրիգորյանի առաջադրումը՝ իր ղեկավարի դեմ այսպես ասած պայքարի դուրս գալը, հավանաբար միայն մեկ բացատրություն կարող է ունենալ: Ինչպես հայտնի է, շատ դեպքերում, երբ ընտրություններում միայն մեկ թեկնածու է առաջադրված լինում, վերջինս օգտագործելով իր լծակները մտերիմներից մեկին համոզում է նույնպես առաջադրվել, որպեսզի քվորում ապահովվի: Հակառակ դեպքում մեկ առաջադրված թեկնածուի դեպքում ընտրությունները չեղյալ են հայտարարվում: Նման կեղծ առաջադրումներից հետո, երբ հասնում է գրանցումների պահը կեղծ թեկնածուն կամ ինքնաբացարկ է հայտարարում՝ միայնակ թողնելով հիմնական թեկնածուին մրցապայքարում կամ էլ մնում է, սակայն որպես կանոն, նրա օգտին քվեարկած քվեաթերթիկները բավական քիչ են լինում:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ