Արևելագետը ԵԱՀԿ Մինսկի խմբի դիրքորոշման մեջ նոր միտում է տեսնում

ԵԱՀԿ Մինսկի խմբի համանախագահները սկսում են ավելի օբյեկտիվ գնահատել իրադարձությունը արցախա-ադրբեջանական շփման գծում:

Մայիսի 23-ին լրագրողների հետ հանդիպման ժամանակ այս մասին ասաց ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը:

«ԵԱՀԿ Մինսկի խմբի համանախագահները մայիսի 18-ի իրենց հայտարարության մեջ թիրախավորված նշում են Ադրբեջանի գործողությունը, և սա նոր միտում է: Կարծում եմ, որ հայկական դիվանագիտությունը պետք է ամեն ինչ անի, որպեսզի պահպանի ԵԱՀԿ Մինսկի խմբի նման ուղղվածությունը,մասնավորապես, որ սկսեն իրականացվել Վիեննայում ընդունված որոշումները, որոնք նախատեսում են հետաքննության մեխանիզմների ստեղծումը սահմանի վրա»,- նշեց Սաֆրաստյանը:

Սաֆրաստյանի խոսքով` Ադրբեջանի իշխանությունը համառորեն շարունակում է իր ագրեսիվ քաղաքականությունը արցախյան հարցում:

«Նրանց նպատակն է շարունակել սահմաններում սադրիչ գործողություններ իրականացնել՝ ճնշում գործադրելով  բանակցային գործընթացի վրա»,- ասաց Սաֆրաստյանը:

Արևելագետը մոտակա ժամանակներում արցախա-ադրբեջանական շփման գծում լուրջ սրացումներ չի տեսնում:

«Ադրբեջանում  տնտեսական դրության վատթարացումը, հասարակության մեջ լարվածության սրացումը կարող են հանգեցնել շփման գծում սրացմանը, և Ալիևի վարչակազմը, փորձելով պահպանել իր իշխանությունը, կձգտի ավելի ագրեսիվ դրսևորումներ ցուցաբերել արցախյան հարցում, սակայն ներկայումս Ալիևը և նրա կլանը շատ թե քիչ կարողանում են պահպանել իրենց ազդեցությունը ամբողջ Ադրբեջանում»,- եզրափակեց Սաֆրաստյանը:

ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ) մայիսի 18-ին  հայտարարություն  են  տարածել  Ադրբեջանի  կողմից  տարածաշրջանում  իրադրության  լարման  վերաբերյալ: Ասված է, որ համաձայն տարբեր վստահելի աղբյուրներից ստացած տեղեկատվության՝ մայիսի 15-ին  Ադրբեջանի   զինված  ուժերը  շփման  գծում  հրթիռ են  արձակել՝  խոցելով  ռազմական տեխնիկա: Մայիսի 16-ի երեկոյից մինչև մայիսի 17-ը  հայկական  զինված  ուժերը  պատասխանել են: