Վերևից իջնելու ժամանակն է

ՀԱՐՑԱԶՐՈՒՅՑ 23 Մայիս, 2017 18:03

Մայիսի 30-ին, 31-ին, հունիսի 6-ին և 7 –ին, ժամը՝ 19.30-ին, դերասան, ռեժիսոր, պրոդյուսեր, սցենարիստ Արտյոմ Մարկոսյանը կներկայանա նոր երգիծական երաժշտական ֆիլմ-մոնոներկայացումով, որը կոչվում է «Մեկը վերևից»: Այն կարող եք դիտել Երևանի պետական կամերային թատրոնում:

Past.am-ը զրուցել է Արտյոմ Մարկոսյանի հետ՝ ներկայացման հետ կապված մանրամասներ ստանալու նպատակով:

- «Մեկը վերևից» վերնագիրը խորհրդավոր է: Ինչո՞ւ «Մեկը վերևից», այդ ո՞վ վերևից:

- Այդ ամենը թող գա և տեսնի մեր սիրելի հանդիսատեսը: Սա պարզապես մոնոներկայացում չէ, սա թատերարվեստի, անիմացիոն կինեմատոգրաֆի և երաժշտության միաձուլում է: Իմ մարմնավորած 6 կերպարները նաև երգում են: Կարող եմ ասել, որ նման բան երբեք չի եղել ամբողջ ԱՊՀ տարածքում թե՛ խորհրդային ժամանակ, թե՛ հետխորհրդային շրջանում: Ներկայացումը մեկ գործողությամբ է, տևելու է երկու ժամ: Ըստ սցենարի՝ իրադարձությունները տեղի են ունենում մեր ժամանակներում, ընթանում են միջմոլորակային պատերազմներ: Այլ մոլորակներից մեկում որոշվում է կործանել Երկիրը: Որպեսզի հաջողության հասնեն, նրանք ցանկանում են Երկրի կործանումը սկսել ամենահին և կարևոր ազգերից մեկից՝ հայերից: Առայժմ կարող եմ ասել այսքանը:

- Ինչո՞ւ ընտրեցիք Կամերային թատրոնը:

- Իհարկե, դահլիճը փոքր է, բայց մթնոլորտը ջերմ է: Այս պահին սիրտս այնտեղ ուզեց: Ցանկացած թատրոնում կարող էի անել, մեր գրեթե բոլոր թատրոնները լավն են: Ընդհանրապես, բնավորություն ունեմ՝ մի բան, որ ցանկանում եմ անել, անում եմ իմ նախընտրած մթնոլորտում: Պարտադրված ոչինչ չեմ սիրում:

- Իսկ փորձերն ինչպե՞ս են անցնում: Բեմում կարո՞ղ է նաև իմպրովիզներ լինեն:

- Բնականաբար, եթե բեմում լավ դերասան է, ապա իմպրովիզը նրա ընկերն է: Հենց հիմա փորձերի փուլում եմ: Ես նաև զբաղվում եմ պրոդյուսերական, կազմակերպչական վերջին աշխատանքներով:

- Ծախսատա՞ր նախագիծ է:

- Բավականին: Վստահաբար կարող եմ ասել, որ մեր երկրի համար նման ձևաչափի ամենածախսատար ներկայացումներից է, եթե ոչ ամենածախսատարը: Ովքեր գիտեն,թե ինչ է 3D անիմացիան, կհասկանան, իսկ 3D-ի պատրաստման գումարը հաշվառվում է վայրկյանով: Շատ թանկ է, սակայն ես սիրով և մեծ վստահությամբ գնացել եմ այդ քայլին (խորհրդավոր ժպտում է Արտյոմ Մարկոսյանը):

- Ըստ Ձեզ՝ կոմերցիո՞ն ներկայացում է: Սպասո՞ւմ եք տոմսերի մեծ վաճառք:

- Իհարկե սպասում եմ, վստահ եմ` այդպես էլ կլինի, սակայն առաջին նպատակն էր ստեղծել իմ ուզած գործը, որովհետև մի քանի տարի մտածել եմ, ցանկացել եմ անել բան, որը դուրս է ստանդարտից և նոր խոսք կլինի, հուսով եմ՝ մտահաղացումս կիրականանա: Բնականաբար, գումար էլ կլինի, բայց միայն հայաստանյան տոմսերի վաճառքից չէ, որ այն կգոյանա, համենայն դեպս ես այդպես եմ ուզում (կրկին ժպտում է մեր զրուցակիցը): Այդ ներկայացումով արդեն հյուրախաղերի առաջարկներ ունեմ: Բայց ինձ համար կարևոր է, որպեսզի սկզբում այն հայրենիքում կայանա:

- Իսկ թեման, այն հումորը կամ դրա մատուցման ձևը, որը ներկայացրել եք, հասկացված կլինի՞ հանդիսատեսի կողմից:

- Անպայման, հանդիսատեսն ամեն բան էլ հասկանում է: Ներկայացումը մեր մասին է և ամեն մեկիս համար: Համոզված եմ՝ ցանկացած հանդիսատես կգտնի իր համար վերցնելու բան: Կարմիր թելով գնում են շատ լուրջ հարցեր: Այն երգիծական երաժշտական կոմեդիա է, բայց պարզապես «հա-հա, հի-հի» անելու ներկայացում չէ: Կներեք արտահայտությանս համար, բայց ոմանք հետույք բացելն են համարում ծիծաղելի և հումորային: Ես այդպիսի բան չեմ անում:

- Որքանո՞վ են մեր արտիստները, սցենարիստները, ռեժիսորներն ու մյուս ստեղծագործողները կարողանում ճիշտ արտացոլել այսօրվա հասարակական, քաղաքական, սոցիալական կյանքը:

- Ձեր նշածն այս ներկայացման մեջ փորձել եմ արտացոլել: Իսկ թե ինչպես, այդ ամենի ճիշտ գնահատականը կտա հանդիսատեսը:

- Ինքներդ ինչպե՞ս կգնահատեք մյուսների աշխատանքները:

- Շատ ստացված գործեր կան, բաներ կան, որ շատ եմ հավանում,կան, որ այնքան էլ չեմ հավանում, բայց դա սուբյեկտիվ է: Այդ ամենը ճաշակի, մոտեցման և ինտելեկտի խնդիր է:

- Դժվա՞ր է Հայաստանում մոնոներկայացում կայացնելը:

- Դա տաժանակիր աշխատանք է, պատասխանատվությունը 10 անգամ ավելի բարձր է: Չհասկացողը կարող է ասել՝ «ի՞նչ է եղել որ, ինչ դժվար բան կա որ»: Սակայն,երբ բոլոր մտքերը, հույզերը մեկ անձ պետք է հասցնի հանդիսատեսին՝ այդ ամենն անելով այնքան անկեղծ ու բնական, որ մարդիկ հավատան, դա դժվարին աշխատանք է և մեծ պատասխանատվոթյուն:

- Ձեզ համար շաբաթը 5 oր հեռուստատեսությամբ հումորային հաղորդում վարե՞լն էր բարդ, թե՞ ներկայացումը:

-Դրանք տարբեր բարդություններ են, համեմատելի չեն: Լավ բանը երբեք թեթև չի լինում: Դու պետք է աշխատես և քրտնես, եթե ուզում ես լավ բան անել:

-Հովանավորների համար ավելի գրավիչ էր «Բերնարդ շոու» հաղորդումը՞, թե՞ «Մեկը վերևից» մոնոներկայացումը:

- Կրկնում եմ՝ դրանք տարբեր բաներ են: Ինչպես գիտեք, «Մեկը վերևից» երաժշտական մոնոներկայացումն ունի բավականին լուրջ ֆինանսական գործընկերներ: Նրանք մեծ սիրով ցանկացան ցուցաբերել իրենց մասնակցությունը դրա ստեղծման գործընթացին՝ թեկուզ միայն իմիջային առումով:

- Հեռուստատեսային նոր ծրագրեր ունե՞ք:

- Իհակե, բայց չեմ սիրում դեռ բան չեղած նախապես օդում խոսել: Քաղաքական դաշտում շատ են օդում խոսացողները:

Վերջում ինձ կարոտող ու սպասող հանդիսատեսին ուզում անկեղծ խոստովանել, որ ես ձեզ սիրում եմ և կարոտով սպասում եմ մեր հանդիպմանը:

Հետգրություն. «Եթե մեր պետությունը հասնի այն մակարդակին, որ մարդը լինի գնահատված ու պահանջված, զբաղվի իր սիրած գործով, որով կկարողանա ապահովել իր կյանքն ու ապրուստը, ապա մենք երջանիկ ազգ և հզոր պետություն կլինենք». Արտյոմ Մարկոսյան

Հարցազրույցը՝ Լևոն Փանոսյանի